ما كاين لا الباز ولا الجزولي ولا بوريطة. ها اللقاء اللي غير مستقبل الصحرا: ساعة بين سيدنا وكوشنير وتلفون ايفنكا للملك بدلو كلشي. الملك لنسيب ترامب: انا امير المسلمين واليهود وعندنا تأثير كبير حتى فالسياسة الداخلية لاسرائيل

فهاد الضربة الكبيرة اللي دارها المغرب وخلى اقوى دولة فالعالم تعترف بمغربية الصحراء كل واحد بدا كيتلاح بلا حيا بلا حشمة. نيويورك تايمز هدرات على دور رجل الاعمال المغربي الباز اللي عندو مطاحن هنا. الباز عندو علاقة بجاريد كوشنير مستشار الرئيس الامريكي دونالد ترامب ونسيبو. الباز هادا صديق لمحسن الجزولي الوزير المنتدب المكلف بملف افريقيا. وعندهم البيزنس بيناتهم.
كانو بجوج وراء تنظيم زيارة كوشنير للمقبرة والصلاة علي الحاخام "بينتو" وقال حينها المستشار الامريكي باللي حقق واحد من احلامو بهاد الصلاة. هادو لعبو دور ولكن دور مساعد فقط.
ثم تنقاز ديال ناصر بوريطة وزير الخارجية والتعاون اللي كيقدم راسو عن طريق الناس اللي كيخدمو معاه فالتواصل باش يقول باللي هو مهندس اتفاقية التطبيع اللي هي جزء من صفقة اعتراف امريكا بمغربية الصحراء. هادي غير وقاحة من وزير عندو مشكل مع راسو. خاص يقول لكلشي باللي هو اللي كيدير كلشي.
اللي لعب دور حاسم هو اللقاء اللي دارو الملك محمد السادس فواحد رمضان مع جاريد كوشنير فالرباط. هاد اللقاء اللي كان بينهم بجوج فقط لا غير دام ساعة وفق مصادر امريكية ل"كود". فيه بدا كوشنير كيهدر على تفاصيل صفقة القرن مع الملك تضيف مصادر "كود" وواحد الوقت بغى يدفع المغرب للتطبيع بحالو بحال باقي الدول. هنا٬ توضح مصادر "كود" دخل الملك اللي كان مرتاح طيلة هاد اللقاء٬ وقال لكوشنير باللي هو امير المؤمنين: مسلمين ويهود. بواللي هادوك مليون من اصول مغربية فاسرائيل عندهم ولاء ليه وباللي ممكن ايلى بغى ولا قرر شي نهار يؤثر حتى على السياسة الداخلية فاسرائيل عبر مخاطبتهم٬ تضيف مصادر امريكية مقربة من المستشار كوشنير ل"كود".
هنا السيد اكتشف شخصية سياسية. تفاجأ بشكل ايجابي. تبع اللقاء لفطور الشهير واللي بان فالصورة وكان فيه مستشار الملك فؤاد عالي الهمة وناصر بوريطة وزير الخارجية.
هاد اللقاء كان عندو اثر كبير فهاد الشي اللي كنعيشوه اليوم.
جات زيارة ايفنكا مرات كوشنير وبنت ترامب للمغرب. هنا كانت التهلية المغربية الاصلية. دوزات ايام وكانت معاها الاميرة لالة مريم. السيدة تصطات بهاد الكرم المغربي الاصيل. طبعا بلا ما نهدرو على زيارتها لسيدي قاسم ولقاءها بنساء الاراضي السلاليات اللي خرجو رابحين من معركة طويلة.
ايفنكا وفق مصادر "كود" باش بغات تمشي طلبات الاتصال بالملك محمد السادس اللي كان فالحسيمة. هدرات معاه وشكراتو بزاف بزاف.
ايفنكا باش رجعات لامريكا حكات كلشي لراجلها ولباها. تزادت صورة المغرب كبرات.
طبعا هنا خدم مزيان كوشنير فاتجاه اعتراف اميركي بمغربية الصحراء واقامة قنصلية بالداخلة. دار مجهود كبير. بقات تفاصيل بسيطة داروها المفاوضين لاسابيع واللي كانت فنيويورك.
اذن اللي كان تحول كبير ماشي هادا او داك راه هو الملك بوحدو لا ثاني ليه