بالفيديو والتصاور. شوفو آش بقا من أوطل "لينكون" اللي طاح وها شركة البني اللي تكلفات بيه.. والمواطنين لميكرو "كود": حنا خايفين وبغينا شي حل

جزء كبير طاح من فندق "لينكون" فالجانب ديالو الخلفي، "كود" مشات باش تشوف حجم الأضرار اللي طالت لوطيل "التاريخي"، بسبب الإهمال ديالو لسنوات بلا ما يترمم أو يتصلح.
وغالبا بتكليف من مجلس المدينة اللي شاد المعالم التراثية فكازا، ومنهم "لينكون"، جات شركة EL2M Resolutions باش تتفقد الأضرار، ودارت نقاشات طويلة قدام المبنى بين مهندسيها المختصين فمجال البناء، حاولات "كود" تتواصل معاهم لكن رفضو الإدراء بأي تصريح.
مجموعة من الحوانت اللي كاينة على جنب لوطيل تسدات بأمر من السلطات المحلية، وحتى محطة الطرامواي دالسوق المركزي توقفات، بحكم أنه كيمكن يزيدو يطيحو أجزاء خرا من لوطيل، وهذشي غيلحق الضرر بالتجار والمواطنين.
مجموعة من التجار كاعيين بزاف بسباب إغلاق محلاتهم، وواحد من العاملين حدا الوطيل صرح ل"كود" أن هذ التجار ضايعين اللي استمر الامر هكذا، وطالبو باش السلطات تتدخل وتحيد الركام باش يستانفو خدمتهم.
أما سكان المنطقة، فعبرو ل"كود" على استياءهم من هذشي، على اعتبار أن لوطيل كيشكل خطر على حياتهم.
فيديو شهادات المغاربة وصور "لينكون" بعد الانهيار هنا: