خاص. شابو. وغاديين مزيان وبزاف. ف48 ساعة درنا كثر من 150 الف ڤاكسان واكبر عملية دارت فكازا

المغرب محيح فعملية التلقيح ضد "كورونا ڤيروس". محيح وبزاف. وفق معطيات تقريبية حصلت عليها "كود" فانه تم تلقيح اكثر من 100 الف مغربي فاليوم الاول لانطلاق الحملة وطنيا الجمعة اللي فاتت. رئيس الدولة كان دشن العملية الخميس ودار الجلبة فالقصر الملكي بفاس وفاليوم الثاني اي الجمعة 29 يناير 2021 بديناها وطنيا.
وفق معطيات حصرية حصلت عليها "كود" فجهة كازا سطات بوحدها فات فيها عدد اللي دارو الڤاكسان 23 الف كازاوي . جهة بحال جهة تادلة بني ملال خنيفرة دار فيها تقريبا نفس العدد. هنا كنهدرو على اليوم الاول= الجمعة=
ووفق مصادر ل"كود" توقعت ان يصل عدد اللي دارو الڤاكسان فاليوم الثاني اي السبت 30 يناير 2021= تقريبا 50 الف مغربي دگات ليه لبرا.
هاد الوثيرة المرتفعة ممكن تبقى غادية بهاد الشكل حتى الاربعا. المغرب اللي جاب جوج مليون من استرازنيكا اوكسفورد و500 الف من سينوفارم الصيني غادي يكمل عملية التلقيح اللي كتهم اللي عندو 75 عام والفوق وناس الصحة والتعليم وكاع اللي كيكون فالصفوف الاولى اللي عندهم اما 40 عام او الفوق او 45 عام والفوق.
غدا وزارة الصحة مع وزارة الداخلية غاديين يديرو بيان على هاد الايام الاولى للقاح وغاديين يعطيو استراتيجيتهم فالتواصل. مع الجايحة كان تواصل الصحة كارثي وبزاف. دابا مع هاد التنسيق بين الداخلية والصحة نتمناو يقادو امورهم.