المدعية العامة ففالنسيا فتحات تحقيق على تخريب البوليساريو لقنصلية المغرب فالمدينة من بعد شكاية المحامي العجوطي.. والأخير ل"كود": هاد القرار غادي يدير حد لهاد التصرفات الهمجية اللي كتضرب فالقانون والأعراف الدبلوماسية – وثائق

فتحات المدعية العامة فمحكمة فالنسيا فاسبانيا تحقيق قضائي فأعمال التخريب اللي داروها بعض الميلشيات المحسوبة على البوليساريو فالقنصلية العامة للمملكة ففلينسيا.
وهذ التحقيق، اللي كتوفر "كود" على نسخة منو، جا بناء على شكاية تقدم بيها المحامي مراد العجوطي، نائب رئيس نادي المحامين بالمغرب، ف18 نونبر الماضي.
وحسب قرار المدعية العامة، غيتم الكشف عن احتمال وجود هذ الجرائم "اللي كتضرب فالخقوق الأساسية والعامة اللي كيكفلها الدستور الإسباني"، وهذشيقصد تحديد المسؤوليات للمحتملة.
وغيتم إرسال هذ الشكاية إلى عميد المحكمة ففلينسيا، وفق لقواعد الاختصاص، واللي غترسل بدورها لمحكمة التحقيق من أجل بدء الإجراءات المناسبة، حسب نص القرار دائما.
وفهذ الصدد، أكد العجوطي، فتصريحو ل"كود" فهذ الصدد، أن "هذ القرار مهم، ومن شأنو يخدم قضية الوحدة الترابية، حيت غيوضع حد لهذوك التصرفات الصبيانية والهمجية اللي كيقومو بيها المرتزقة ديال البوليساريو، واللي كتضرب فالقانون".
واعتبر أن هذ التحقيق "كيبين أن مرتزقة البوليساريو كيخرقو جميع الأعراف الديبلوماسية، وهذشي كيبين الوجه ديالهم الحقيقي باعتبارهم منظمة إرهابية"، كيف كيشوف العجوطي أنه "تحذير لأعداء الوحدة الترابية اللي قامو بمجموعة من التصرفات الهمجية بحال اللي وقع فالقنصلية دالمغرب فأوطريخت اللي كانت فالسيمانة اللي فاتت"، حسب تعبيرو.
وقال أن هذ القرار مزيان، لأنه غيمكن من متابعة هذ الأشخاص واخا يكونو خارج التراب الوطني، "خصوصا وأنهم كيقومو بمس ممثلية ديبلوماسية، وهذي جريمة شنعاء كيتعاقب عليها القانون بالسجن حتى ل3 سنين، حيت التمثيلية الديبلوماسية كتمتع بحصانة وماخاصش تخترق هذ الحصانة ديالها بأي شكل من الأشكال"، على حساب هضرتو.
وفشكاية العجوطي للمدعية العامة ففالينسا، اللي اطلعات "كود" على تفاصيلها، قال أنه "كينقل ليها مشاعر الغضب والحزن بعد أعمال التخريب اللي كانت ف14 نونبر 2020، واللي ارتكبوها بعض أعضاء جماعة البوليساريو ضد مقر القنصلية العامة للمملكة المغربية في مدينة فالنسيا، واللي خرقات حرمتها".
وزاد المحامي: "كنلتمس منكم إطاء تعليماتكم من أجل الشروع في القبض على مرتكبي هذه الجريمة الفظيعة والوحشية، اللي كتشكل انتهاك خطير للقانون الدبلوماسي الدولي، وكذا المادتان 605 و 6060 التي أنشأها قانون العقوبات الإسباني، واللي كتعاقب على وجه التحديد الهجمات على المرافق الدبلوماسية والقنصلية".
أدان المغرب، الإثنين، أعمال التخريب والعنف التي استهدفت قنصلية المملكة في مدينة فالنسيا الإسبانية (شرق).
وكان المغرب عبر على إدانتو لأعمال التخريب والعنف اللي استهدفات قنصلية المملكة في مدينة فالنسيا، بحيث "قاموا بتعليق علم البوليساريو بدل علم المملكة في القنصلية"، كيف قالت سفيرة الرباط لدى مدريد، كريمة بنيعيش، فتصريح رسمي ليها فهذ الصدد.
وكملات السفيرة هضرتها كتقول أن السفارة تابعت ما قام به عناصر من جبهة "البوليساريو"، واعتبرات أنها "أعمالا إجرامية وغير مسؤولة، قامت بها شرذمة من المجرمين، المؤطرين من طرف عصابة البوليساريو الانفصالية".