شركة طرام كازا خرجلها العقل بسباب اوطيل لينكولن.. البارح حبسات الخط 1 واليوم طلقاتو بلا ما تشرح علاش

قرار مامفهومش اتخذاتو شركة طرامواي كازا، لبارح الاربعاء فالعشية، فاش قررات توقف الخط 1 الرابط بين سيدي مومن وليساسفة، تماما كيفما كانت دارت فاش راب أوطيل "لينكلون" التاريخي هذي شهراين دابا، لكن سرعان ما تراجعات اليوم على هذ القرار المفاجئ وطلقات الخط عادي.
لبارح الاربعاء، علنات الشركة، فبلاغ فالباج ديالها ف"فيسبوك"، أنها بسباب أوطيل "لينكون" غتقطع الخط اللول للمرة الثانية، وخا كانت طاقاه قبل، وغيولي يحبس الطرام فالأمم المتحدة الى كان جاي من ليساسفة، وفالحي المحمدي الى كان حاي من سيدي مومن.
كيف غيخص الزبناء اللي بغاو يمشيو للمدينة يبدلو فمحطة المواصلة ابن تاشفين ويشدو الطرام فمحطة المذاكرة، ومن انوال فاش يوصلو يعاودو يشدو الخط الأول، تماما كيف كان الامر عليه فاش راب لوطيل.
لكن من بعد ما غوتو الناس واستنكرو ففيسبوك فالتعليقات على البلاغ اللول، بحكم أن هذ القضية مامسلكاهمش وكتعطلهم على خدمتهم، واقيلا الشركة رجعات فقرارها، ودارت بلاغ أخير، اليوم الخميس، كتعلن فيه أن الخط الأول رجع تطلق من جديد، بشرط تبقى محطة السوق المركزي اللي فين كاين لوطيل خارج الخدمة، حفاظا على سلامة الزبناء، تماما كيف تدار بعد ما تطلق الخط بعد انهيار لوطيل.