نشرة كورونا النصف شهرية: كَاع المؤشرات تحسنات بزاف والإصابات والوفيات تراجعو

فالفترة الممتدة ما بين 11 حتى ل24 ماي 2021، عرف المغرب تحسن وبائي كبير، بحيث عرف انخفاض فعدد الحالات الجديدة والحالات النشطة والوفيات.
أما بخصوص المنحى الوبائي الأسبوعي، قال عبد الكريم مزيان بلفقيه، رئيس قسم الأمراض السارية فوزارة الصحة، أننا سجلنا انخفاض ب29,8 فالمية هذ السيمانة بالمقارنة مع السيمانة لي فاتت، بحيث سجلنا هذ الأسبوع 3159 إصابة.
وبالنسبة لمنحى الوفيات الأسبوعي، فسجلنا انخفاض ديال 7,7 فالمية، بحيث ماتو هذ السيمانة 24.
وبخصوص لعدد الوفيات حسب الجهات، كتجي جهة كازا سطات فالمقدمة ب14 وفاة، بعدها الرباط سلا ب3 وفيات، وجهة درعة تافيلالت وسوس ماسة بجوج وفيات، ثم جهة مراكش آسفي وجهة بني ملال خنيفرة وجهة العيون الساقية الحمرا بوفاة واحدة فكل وحدة فيهم.
أما بالنسبة لإيجابية التحاليل، فكازا فهذ السيمانة اللخرة كتجي فالرتبة الأولى ب8,12 فالمية ديال الإيجابية، كتجي بعدها جهة سوس ماسة ب5,73، ثم جهة طنجة تطوان الحسيمة ب4,13..
وتسجل انخفاض فعدد المرضى اللي كاينين فأقسام الإنعاش، بحيث فالسيمانة اللخرة، هبطنا من 218 حالة ل187 حالة، بينما تحدد عدد الناس اللي كيديرو التنفس الاصطناعي الاختراقي ف7 مصابين.
وبالنسبة لترتيب المغرب عالميا، أكدات وزارة الصحة فنشرتها أن المغرب نزل جوج مراكز فعدد الإصابات، وصبح كيحتل المركز 43، بينما بقا فالمركز 44 فالوفيات والمركز 48 فعدد الكشفات.
أما على المستوى الإفريقي فترتيب المغرب ماتغيرش كَاع، بحيث بقى فالمركز 2 فالإصابات والكشفات، والمركز 4 فالوفيات.