نشرة كورونا النصف شهرية: الحالة الوبائية مستقرة واخا كاين ارتفاع قليل فالإصابات.. والوفيات نقصو ب30 فالمية

لحد الساعة، كَاع المؤشرات كتبين أن الوضعية الوبائية فالمغرب تحسن ومتحكم فيه، فالفترة الممتدة ما بين 1 حتى ل15 مارس 2021، الوفيات هبطو بشكل كبير، وتقريبا جميع الجهات فيها معدل إصابة أقل من 20 لكل 100 ألف نسمة، لكن فالمقابل عرفات الوضعية الوبائية هذ الأسبوع الأخير ارتفاع طفيف فحالات الإصابة والحالات اللي كتتلقى العلاج فأقسام العناية المركزة بالمقارنة مع قبل.
بخصوص المنحى الوبائي الأسبوعي، قال عبد الكريم مزيان بلفقيه، رئيس قسم الأمراض السارية فوزارة الصحة، أننا سجلنا ارتفاع ديال 5,6 فالمية بالمقارنة مع الأسبوع اللي فات، بحيث سجلنا 2714 إصابة مقابل 2569 بالمقارنة مع السيمانة اللي فاتت، وشمل هذ جهة كلميم وادنون بنسبة 27,3 كأعلى تقدير.
وكشف مزيان بلفقيه أن جميع المناطق فالمغرب تقريبا فيها اقل من 20 حالة لكل 100 ألف نسمة، باستثناء إقليم وجدة وعمالة كازا اللي عندهم من 20 حتى ل50.
وبالنسبة لمنحى الوفيات، فسجلنا انخفاض ديال 30,5 فالمية، بحيث ماتو هذ السيمانة 41، مقابل 59 ماتو السيمانة اللي فاتت.
بالنسبة لعدد الوفيات حسب الجهات، كتجي جهة كازا سطات فالمقدمة ب14 وفاة، بعدها جهة الشرق ب6، ثم جهة الرباط ب4، وجهة مراكش آسفي وطنجة تطوان زبني ملال خنيفرة ودرعة تافيلالت ب3، ثم جهة فاس مكناس وسوس ماسة ب2، وجهة كَلميم وادنون حالة وفاة واحدة.
أما معدل الإصابة الأسبوعي لكل 100 ألف نسمة، فحقق ارتفاع ل7,5 فالاسبوع الأخير، بينما كان محدد ف7,1 فالسيمانة اللي قبل.
وتسجل ارتفاع فعدد المرضى اللي كاينين فأقسام الإنعاش، بحيث فالسيمانة اللخرة، دزنا من 375 حالة ل401 حالة، لكن المؤشر منخفض بالمقارنة مع السيمانة اللي قبل، واللي كان فيها عدد الناس فأقسام الإنعاش 440.
وبخصوص مؤشر توالد الحالات على الصعيد الوطني فنهاية الأسابيع اللي فاتو، فبلغ ف28 فبراير 0,98، وف7 مارس 1,00، وفالأحد 14 مارس 1,05.
وبالنسبة لترتيب المغرب عالميا، أكدات وزارة الصحة فنشرتها أن المغرب نزل 3 مراكز على مستوى الإصابات، واحتل المركز 37، كيف نزل للرتبة 38 من ناحية الوفيات برتبة واحدة، لطن فالمقابل نزل فعدد الكشوفات وولا كيحتل المركز 44 بعدما خسر جوج بلايص.
أما على المستوى الإفريقي فترتيب المغرب ماتغيرش، بحيث باقي الثاني إفريقيا على مستوى الإصابات والكشوفات، والثالث فعدد الوفيات.