لوبي الأطباء المرفحين تصدمو.. قانون مزاولة الأجانب لمهنة الطب اللي غادي يمنع احتكار هاد اللوبي للمصحات الخاصة داز بالاجماع فالبرلمان.. ومصدر ل"كود": جهات عليا تدخلت قبل التصويت على المشروع وقطعات الطريق على مساخط الصحة

علمت "كود" من مصدر مطلع أن مشروع القانون رقم 33.21 بخصوص مزاولة مهنة الطب، واللي منح الحق للأطباء الأجانب باش يزاولو المهنة فالمغرب، داز لبارح فلجنة القطاعات الانتاجية بمجلس النواب، بالاجماع.
وكشفت مصادر برلمانية ل"كود" أن تدخلات وصفت بالعليا هي التي أدت الى تمرير المشروع بدون تعديله، بحيث تشكلت لجنة تقنية قبل بدء عملية التصويت فلجنة القطاعات الانتاجية بمجلس النواب.
هاد اللجنة التقنية اللي عمرها دارت، مكونة من رؤساء الفرق ورئيس مجلس النواب ، وحضر فيها وزير الصحة، في سابقة من نوعها، صباح يوم أمس، بحيث خاطبهم وزير الصحة بلي هاد المشروع خصو يدوز كما جابتو الحكومة، وبلي هادي ارادة الدولة.
طبعا رؤساء الفرق تفاجؤوا فاش شافو وزير الصحة حضر مع الحبيب المالكي فهاد الاجتماع، فبالنسبة للبعض مبقاش فصل السلط، وان السلطة التنفيذية تدخلت في عمل واستقلالية السلطة التشريعية.
مصدر آخر، برر حضور وزير الصحة، بوجود تحركات للوبي الاطباء المرفحين اللي تلاقو مع فرق احزاب (الاستقلال، الاتحاد والبام) باش يضغطو ويمررو تعديلات اللي بغاو وطبعا باش يحافظو على مصالحهم ويزيدو فالثروات اللي عندهم.
تعديلات اللي خدمو عليها الفرق البرلمانية ضربات فالزيرو، وذاز مشروع القانون كيف جابتو الحكومة. هادشي جاي من الفوق يقول مصدر "كود".
وبلغ العجز البنيوي في قطاع الصحة مستوى غير مسبوق، حيث تتجاوز حاجيات القطاع 97 ألف مهني (أزيد من 32 ألف طبيب وطبيبة و65 ألف من الممرضين).
وحسب عرض لوزير الصحة اليوم بلجنة القطاعات الانتاجية في لقاء سابق، فإن نسبة استعمال المناصب المالية المخصصة للأطقم الطبية والتمريضية لا تتجاوز في بعض الأحيان حاجز 30 في المائة.
وينص مشروع القانون رقم 33.21 بخصوص مزاولة مهنة الطب، على شروط معينة بالقطاع بصفة قارة من قبل الأطباء الأجانب.
يشار الى ان لوبي الأطباء المرفحين مشا عند شي برلمانيين باش يضغطو على الحكومة تبدل المواد ديال مشروع القانون المتعلق بمزاولة مهنة الطب، خصوصا المواد اللي كتهضر على الأطباء الاجانب والمستثمرين الأجانب فالصحة.
هاد اللوبي ديال الأطباء دار رسائل الحكومة اللي تجاهلتهم، حيث الحكومة عارفهم مزيان، مجاوبتهمش، ودبا مشاو عند بعض البرلمانيين باش يديرو البلوكاج لهاد المشروع.
طبعا قبل ما يمشيو عند البرلمانيين، دارو مجلس وطني وتحركو ودارو اتصالات كثيرة، حيث عارفين بلي هاد المشروع الجديد اللي جا في اطار تنزيل برنامج الحماية الاجتماعية اللي توقع أما أنظار الملك، غادي يقيس مصالحهم ويزيرهم شويا، وبالتالي غادي نشوفو منافسة قوية خصوصا فيما يتعلق بالاستثمار فالمصحات الخاصة.
هاد اللوبي ديال بعض الأطباء المرفحين الملايرين اللي دايرين ما بغاو فقطاع الصحة، خرجو عينهم فالحكومة وكيفرضو قانون مزاولة الطب اللي كيمنح الحق للأطباء الأجانب يزاولو المهنة فالمغرب.
دبا هاد اللوبي تقولب. تصدم.. حتى حد مسمعش ليه. البرلمان صدمهم، وطبعا هادي خدمة الدولة اللي عاقت بهم.