التونسية غادة طالعة بحال الصاروخ.. أنس جابر ولات أول لعابة مغاربية وعربية كتوصل لربع نهائي ويمبلدون للتنس فالتاريخ

تأهلات أنس جابر، اليوم الاثنين، لدور الربع النهائي فبطولة ويمبلدون للتنس، من بعد فوزها ب5-7 و6-1 و6-1 على البولونية إيجا شيانتيك.
وبهذشي كتكون جابر اول مرا مغاربية وعربية كتوصل لربع النهائي فهذ البطولة.
وخسرات جابر 4 أشواط متابعين، باش تحسم المنافسة البولونية المجموعة الأولى لصالحها، قبل ما ترد عليها اللاعبة التونسية وتتفوق على بطلت فرنسا المفتوحة على الملعب سابقا عام 2020.
وفهذ الدوري، ربحات جابر 2 لاعبات كبار بالإضافة لإيجا شيانتيك، هوما فينوس وليامز وجاربين موجوروزا.
https://www.lequipe.fr/Tennis/Actualites/Ons-jabeur-renverse-iga-swiatek-et-se-qualifie-pour-son-premier-quart-a-wimbledon/1268230
وفحوار سابق ليها مع المجلة الفرنسية "ليكيب"، بعد مرورها لمرحلة الثمن النهائي فالبطولة، قالت جابر أن اعتبارها اول امرأة عربية كتوصل لهذ المرحلة، وحب الناس لأداءها ومتابعتهم ليها، كيعني ليها بزاف، "كيتبعوني بالخصوص الشباب، وكنتمنى نلهمهم ونلعب معاهم شي نهار، ومابغيتش نوقف فهذ الحد حيت هذي ماشي النهاية"، حسب تعبيرها.
وتأسفات جابر لوجود عيالات عربيات قلالات فهذ الدومين، "أنا فاللول ماكنتش كنآمن براسي، خصوصا وأنني عمرني ما شفت شي لاعبات تونسيات فالتلفزيون، ولكن من بعد خدمت باش نرجع هذ الحلم ممكن، وكنتمنى تتغير الأمور ونوليو نشوفو لاعبات عربيات كيتبعو أحلامهم ويدخلو السيركوي"، كيف قالت.
وفخورة جابر بنجاحها بزاف، ومآمنة براسها، بعدما حرزات بزاف ديال التقدم فالعاماين اللخرة اللي فاتت، ووصلات للربع النهائي فبطولة أستراليا، وربحات فأول بطولة ليها الشهر اللي فات، كتقول: "أنا ثايقة فراسي، وأنا قاصحة كثر دابا، المهبة مزيانة ولكن ماكافياش باش تربح... بفضل العمل اللي كنديرو مع المدرب ديالي، والاستراتيجية اللي كندير قبل المباريات، كنعرف كيفاش كيتحرك الخصم وفوقاش، وليت خطيرة كثر".
الحوار الكامل هنا:
https://www.lequipe.fr/Tennis/Actualites/Ons-jabeur-premiere-femme-arabe-qualifiee-en-huitiemes-de-finale-a-wimbledon-je-ne-veux-pas-m-arreter-la/1267641
وأنس جابر (26 عام) لاعبة تنس تونسية محترفة، واخدة المرتبة 28 فتصنيف رابطة محترفات التنس، كتعتبر أول مرا عربية كتفوز بلقب فبطولات رابطة محترفات التنس، بفوزها فنهائي دورة برمنكَهام.
وقبل منها في بطولة أستراليا المفتوحة للتنس عام 2020، كانت أنس جابر المرا العربية والإفريقية الوحيدة لي وصلات لربع نهائي إحدى البطولات الكبرى لكرة المضرب (الگراند سلام).