أخنوش جاي للشرق باش يحسم ف وكلاء اللوائح الانتخابية ويدعم المرشحين ديال الأحرار ف الغرف المهنية

من المرتقب أنه يكون عزيز أخنوش، رئيس حزب التجمع الوطني للأحرار، يوم الأحد الجاي، ف جهة الشرق، باش يتم الحسم بشكل نهائي فالمرشحين نتاع الحزب في الانتخابات التشريعية والجهوية الجاية، ويدعم المرشحين ديال "الحمامة" ف الغرف المهنية.
وذكرت مصادر ل"كَود" من داخل حزب الأحرار، أن الزيارة اللي غا يقوم بها أخنوش، غادي تشمل 3 ديال الأقاليم، واللي هي، بركان، الناظور، الدريوش، وهي اللقاءات التي غادي يتم خلالها الحسم ف مرشحي الحزب.
وأضافت المصادر ذاتها، أن زيارة رئيس حزب "الحمامة"، غادي تكون فرصة مهمة لتوجيه المرشحين ديال الحزب ف الانتخابات الخاصة بالغرف المهنية، وكذا رسم الخطوط العريضة للتحالفات اللي ممكن يدخل فيها الاحرار مع الأحزاب اللي غا يشوفها مناسبة.
وفي نفس السياق، أفادت مصادر "كَود"، أن محمد قدوري رئيس غرفة الصناعة التقليدية السابق هو اللي غادي يترشح للرئاسة، في حين غا يترشح لرئاسة غرفة التجارة والفلاحة، كل من الرئيسين السابقين للغرفتين، ميمون أوسار، و عبد الحفيظ الجارودي.
ويشار إلى أن حزب "الحمامة" كايراهن بشكل كبير باش ياخذ رئاسة الغرف المذكورة، وبعدها غادي يرسم الخطوط العريضة للخريطة السياسية بجهة الشرق، ويشوف التحالفات اللي غادي تمكنوا من الحصول على رئاسة أكبر عدد من الجماعات الترابية والمجالس الأخرى في الشرق.