التراكتور فالعاصمة طاحو الأسهم ديالو.. استقالات كثيرة لأعضاء مجلس المدينة والدينامو الانتخابي الجماني غادي للأحرار

استقالة مور استقالة، البام تعرض لهزة انتخابية قبل اسابيع من الاستحقاقات الجماعية والبرلمانية، بحيث قدم عدد مهم من المنتخبين المنتمين للبام بمجلس مدينة الرباط لاستقالتهم بعد نشوء صراعات مع اعضاء المكتب السياس الحالي للحزب.
اعضاء مجلس مدينة الرباط، المنتمين للبام كاعيين على طريقة تدبير الملف الانتخابي ورفضو يخدمو مع المهدي بنسعيد وبن براهيم وبنهمو.
حسب معطيات "گود"، هادو اللي قدمو استقالتهم كاملين غادين للأحرار، وفضلو يشتغلو مع عمر البحراوي (الملتحق مؤخرا بالحمامة)، عمدة الرباط سابقا.
استقالات اخرى جايا فالطريق، من بينها المنسق الاقليمي السابق للبام، وهشام اقمحي الجماعي النشيط والمزعج واللي كيأطر المجتمع المدني واحتجاجات المهنيين، تاهو غايمشي بشكل نهائي من البام، حيث تقول مصادر "گود" بأن الوجهة القادمة هي الاحرار وباغين يشتغلو مع الجماني.
الأحرار فالعاصمة دار مفاوضات مع الدينامو الانتخابي للبام ابراهيم الجماني، اللي مبقاش باغي يجلس فالبام. الجماني عندو قوة انتخابية فاليوسفية (دائرة الموت).
مصادر "گود" قالت بلي الجماني قريب يلتحق للأحرار، مضيفة :"غاتكون ضربة قاضية للبام والبي جي دي، بحيث ان عدد من المنتخبين غادين يمشيو مع الجماني لسبب بسيط حيث عندو الكلمة ومكيخويش بهم عكس العديد من الاعيان اللي كيفرقو فالوعود الزائفة".
التحركات الانتخابية فالعاصمة فصالح الأحرار حاليا، بحيث ان عدد من رجال الاعمال مبقاوش باغين التجربة السابقة ديال، باغين تجربة جديدة والدليل "هو ان منتخبي الحمامة لعبو دور كبير في عدد من المشاريع اللي تنزلات فالعاصمة، والنائب الاول ديال العمدة هو من الاحرار" تقول مصادر "گود".
يشار إلى أن عائلة الجماني، وأشهرهم خطري ولد سعيد الجماني، كانت من بين مؤسسي حزب التجمع الوطني للأحرار، رفقة كل من علي بوعيدة وفيضول واحمد الدرهم.