صراع على وزارة الصحة بين الاحزاب السياسية القوية، خصوصا مع اقتراب ظهور نتائج المهمة الاستطلاعية حول صفقات كورونا. وحسب مصادر "گود" فإن الصراع اشتد مؤخرا بين حزبي الاستقلال والتجمع الوطني للأحرار، بحيث ان الحديث داخل دواليب الوزارة ينصب حول حملة الاستقطابات التي يقوم بها الحزبين. الاستقلال كان شد الوزارة ايام ياسمينة بادو وكان معاها رحال المكاوي وكان اللي جا من بعدها الحسين الوردي باغي يدي ملف الفساد اللي لقاه للقضاء ولكن منعوه وهو اللي خلاه يستاقل وما تقبلاتش منو ديك الاستقالة دابا حسب مصادر "كود" قرر عدد من الأطر الالتحاق الى الأحزاب، خوفا من المحاسبة وبحثا عن الحماية الحزبية، خصوصا في ظل وجود تقارير سوداء لمفتشية المالية ومفتشية الصحة تفيد وجود شبهات تورط فيها موظفون بالوزارة. هادو خاصهم يتشدو ماشي ينضمو للاحزاب وعن محاولة بعض الأطر التحاق الأحزاب قصد الحصول على الحماية والحصانة السياسية، قال القيادي الاستقلالي عبد السلام اللبار إن "حزب الاستقلال ميمكنش نتسترو على ناس عندهم اختلالات"، مضيفا :"حنا ماشي ضابطة قضائية نقولو هذا متهم وهذا لا". وأوضح اللبار ل"كود" :"نطبق القاعدة المعروفة المتهم بريء حتى تثبت إدانته، لذلك لا يمكن إلا أن نرحب بجميع الأطر التي تريد الالتحاق بحزب الاستقلال". السي اللبار ما هدرش على تدبير بادو ومساعدها رحال للوزارة وفي سياق متصل علمت "كود" أن مدير الموارد التخطيط والموارد المالية بوزارة الصحة، التحق بالاحرار، وهادشي زاد خلق التشويق فهاد الميركاتو الانتخابي قبل شهرين فقط من انتخابات 2021. وفي موضوع ذات صلة، فإن نتائج الانتخابات الأخيرة للجن الثنائية بينات تفوق وسيطرة نقابة الاتحاد المغربي للشغل على المقاعد المخصصة بوزارة الصحة، وهادشي خلق لباقي المنافسين ازمة داخلية وتنظيمية، خصوصا نقابتي البام والبي جي دي. نقابة البام جابت غير 3 مقاعد، والاتحاد الوطني للشغل ديال البي جي دي 7 مقاعد، ضعاف بزاف، والاطر والموظفين ديال الصحة كيمشيو مع النقابة القوية حاليا الاتحاد المغربي للشغل. اما الكنفدرالية الديمقراطية للشغل اللي فيها اليسار الاشتراكي الموحد، خصوصا وان الكاتب الوطني ديالها فالصحة هو البرلماني باسم فيدرالية اليسار الشناوي، كان طيلة الفترة الماضية مكيهضرش على وزير الصحة وضارب الطم ومكينتقدوش سواء على صفقات كورونا او الاختلالات اللي كتعرفها مديرية الادوية والصيدلة. لكن مؤخرا بعدما خرجات شي مناصب ومتعينوش الاطر المحسوبة على الكنفدرالية، دارت هاد النقابة مؤخرا بيان ناري ضد الوزير. اطار بوزارة الصحة قال ل"كود" بلي الصراع كبير بزاف بين الاستقلال والاحرار. الحمامة ديما باغية هاد الوزارة وقالتها اكثر من مرة وباللي مستعدين لتدبيرها ووجدو برنامج كشفو على بعض تفاصيلو هاد ليام٬ فالمقابل نزار بركة وعد بعض الاطر بأنه غادي يجي ويقاد الوزارة ويتهلا فالموظفين. الوزارة خاصها اللي كيتهلى فالمواطنين ماشي فالموظفين. خاص مستشفى عمومي قوي جدا باش تنجح تجربة التغطية الصحية
