واش الحكومة غاتراجع على قرار السدان.. مسؤول بوزارة الصحة ل"كود": صافي وصلنا الأوج والمؤشرات اللي عندنا كتقول بلي الاصابات غادي ينزلو وغايكون استقرار وبائي

كشف مسؤول بوزارة الصحة، في اتصال مع "كود"، عن وجود مؤشرات كثيرة باش يكون انخفاض واستقرار الحالات المصابة بفيروس كورونا فالأيام المقبلة، بعد 6 أسابيع من التصاعد المهول والمتتالي.
وأوضح ذات المسؤول أن "هذه المؤشرات العلمية، المرتبطة أساسا بمعدل انتشار الفيروس (معدل التوالد RT الذي بلغ مرحلة الأوج) وسرعة الانتشار ونسبة ايحابية الحالات المستقرة، تفيد بأننا في مرحلة الأوج والتي ستستمر هذا الأسبوع وفي أبعد تقدير الأسبوع المقبل".
هاد المسؤول قال ل"كود" بلي هاد المؤشرات كتعني وصلنا للأوج ديال انتشار الفيروس فهاد الموجة الثانية، مشيرا إلى أن اغلب الدول اللي عاشت الموجة الثانية عرفات استمرار التصاعد في عدد الإصابات لما يقارب 6 إلى 7 أسبوع، والمغرب دوز حاليا 6 أسابيع من الارتفاع.
وبالرجوع الى الأرقام، فإنه إذا كانت الزيادة في عدد الإصابات في بعض الأسابيع مقارنة باللي فات، وصلت ل50 في المائة أو 60 في المائة، فراها دبا رجعات ل10 في المائة (بمعنى واخا كيطلعو الاصابات فالنسبة كتزاد ب10 في المائة بالمقارنة مع الاسبوع اللي فات).
دبا بهاد المؤشرات اللي كاينا عند وزارة الصحة، واش الحكومة غادي تراجع على قرار الاغلاق مع التاسعة ليلا اللي تضررو منو ناس بزاف ومعجبهمش الحال، واللي ضرب الاقتصاد بزاف. وخسائر بالملايين.
لبارح الأربعاء سجلت وزارة الصحة إصابة 10 آلاف و603 إصابة جديدة بكورونا المستجد و 7774 حالة شفاء و 66 وفاة خلال ال24 ساعة الماضية.