علاش ناس الشمال نقيين ومدنهم نقية من غير طنجة الدولة لي نقاتها.. ومدن الداخل موسخة ومكرفصة واش ناس الشمال كيبغيو بلادهم كثر من لخريين؟

الواجهة البحرية بين كابو نيگرو و كاستييخو( الفنيدق بلهجة ناس الداخل) بالنسبة ليا هي أحسن بلاصة في المغرب فين يقدر يعوم الواحد في ظروف إنسانية وبمعايير عالمية، البحر نقي الناس نقيين الطواليطات بالعرام ووعزل وختار ها الرومي ها البلدي، مثلا شاطئ ألمينا فيه تلاتة ديال الطواليطات كل واخد فيهم فيه ربعة دالكابينات حدا بعضياتهم، ومقابلينهم ونقيين بزاف وفيهم أي حاجة تحتاجها، بالاظافة الى أماكن ولوج الشاطئ خشبية والدوش عمومي مجاني في كل مدخل، عاد زيد على هادشي باراسولات فابور دايراهم البلدية، أنا كواحد مشا للبحورة من السعيدية حتى لسيدي ايفني الشواطئ بين كابو نيگرو والفنيدق هي احسن شواطئ في المغرب بالنسبة ليا من ناحية النظافة والتجهيزات وحضور الأمن، مثلا شاطئ بحال تشارانا في الناظور بمنظر خيالي ولما صافي ذهب ومع ذلك عامر زبل وغير مجهز ومهمل، كذلك مينا روسيتا وتيبودا هادو راه بلايص بحال داكشي ديال اليونان والطاليان ولكن مهملين ومنقيينش وغير مجهزين.
وحاجة خرى يقدر يلاحظها أي واحد مشا للشمال هي أن الناس ديال المنطقة أصلا نقيين وعندهم غيرة على المدن ديالهم وبلادهم، واحد النهار جاو ريحو حدانا واحد المجموعة ديال الدراري زوافرية فيهم لي واشم وشامزالحبس وكاين لي ضارب يديه ومع ذلك ريحو محتارمين طالقين الموسيقى بشوية وماتسمعش هضرتهم وحتى الزبل ديالهم جمعوه في ميكة ولاحوه في الطارو فاش طلعو، بحال هاد الگريپة الى ريحو حداك في الداخل غادي يكرهوك في البحر غير بغواتهم وهضرتهم، اما الى ريحو حداك بحال هادو قصراوة في بحر العرايش احتمال كبير حوايجك مشاو، وحتى في المدينة كيبانليك بنادم مكيلوحش الزبل في الزنقة وكاين احترام كبير بزاف لممر الراجلين، هاد الاحترام لي في الرباط ومكاينش، والناس عندهم غيرة على الصورة ديال مدينتهم، حتى من قبل هاد المشاريع والإصلاحات وبحكم انني كنت كنخدم هنا في البيع والشرا، راه بداها من القصر الصغير حتى للرينكون مرورا بتلاتة دتاغرامت ولخميس لنجرة جبالة ديال هاد المنطقة أصلا نقيين ومعقولين، مثلا في تاغرامت كان يمكن تخلي السلعة ديالك محطوطة وتمشي تتغدى او تفطر وترجع ماتلقاش بياسة وحدة تسرقات ليك، السرقة والشطارة كانت عندهم نادرة جدا، والفيلاجات والدشورة ديما نقيين والجبلية كتجي للسوق من أساسيات التقدية هو الجير، ديما ديورهم بيضين ومجيرين، وحتى لباسهم الجبليات كيلبسو البيض وكيحافضو عليه نقي، تلقاها في السوق كتبيع الربيع والخضرة وهي نقية كتشعل، على عكس العروبية بحالي فيلاجاتهم موسخين وديورهم مخلطين بينهم وبين الكسيبة، وكتلقى السيد فلاح كبير لاباس عليه ديال بصح وجلالتو عامرة بزق ديال الدجاج، وعموما الشلوح وجبالة سكان الجبال نقيين على سكان السهول الفلاحية الخصبة واخا لاباس عليهم.
هاد الغيرة على المدينة والبلاد والمنطقة قليل فين كتشوفها في مدن الداخل الصراحة، مثلا مكاينش شي غابة او منتزه طبيعي او سد او بحيرة نواحي فاس وتازة ومكناس ماعامرينش بالزبل، كاين مناطق نائية مثلا بحيرة إيفر راه معزولة ومع ذلك عامرة زبل، وا بويبلان صعيب باش توصليه والطريق مكرفصة ونهار مشيت ليه لقيت غير شي رعاة مساكن ولاد المنطقةً هوما لي جمعو الزبل وكيحرقوه، الزبل لي خلاوه الزوار وصحاب السياحة الداخلية، واحد المرة وقفت فواحد لخلا بين اغبالو اسردان والدورة ديال بومية في الطريق لي كتخرج في زايدة، فداك السفح وجبل العياشي كيبان قبالتك عامر ثلج منظر زوين خصرو الكم الهائل ديال القراعي دالشراب والباط ديال الطون والسردين وليكوش وكاع أنواع الزبل، مصيبة كحلة حقيقية، الصراحة الشمال راه نقي بالمشاريع لي دارت فيه وبإرادة الدولة وحتى إرادة الناس ديالو، كيبغيو المدن والمناطق ديالهم والنقى فيهم طبيعة، أما راه نفس الشريط الساحلي كنظن الى تدار بين ازمور والجديدة وسيدي بوزيد حتى لمولاي عبد الله ، غادي يخربوه الهايش مايش تما هادي مافيهاش كيف ما خربو أي حاجة تدارت تم.