بنكيران جا فالدقايق للخرا خرج يدعم حزبو اللي خانو. هاجم اخنوش وبان باللي عارفو رابح الانتخابات وسب لشكر وضرب العدل والاحسان

عبد الاله بنكيران كان مقرر ما يشاركش فحملة حزبو فالانتخابات. قبل 3 ايام من التصويت خرج باش يهاجم المرشح الاوفر حظا للفوز بها.بنكيران فخطابو عارف ان الاحرار هما اللي غاديين يربحو الانتخابات او عندو معطيات باللي حزبو يستحيل يجي للول. هاد الشي علاش بدا كلمتو اللي دارها فصفحتو على الفايسبوك بمهاجمة عزيز اخنوش.
بنكيران قال باللي رئيس الاحرار ما يمكنش يكون رئيس حكومة. جبد ليه المقاطعة والثروة وعلاقتو بيه واكد انو "رجل اعمال" وحتى فهادي اتاهمو
بنكيران هاجم حزب الاحرار وقال "فيناهو الحزب باش غادي تخدم" وان الدولة غادية تلقى راسها فاص افاص للمجتمع كيف وقع مع عشرين فبراير
رئيس الحكومة السابق هدر على ما اعتابرو خصال خاصها تكون فرئيس الحكومة ولكن ما قالش لينا واش هاد الخصال اللي هدر عليها كتوفر فشي سياسي عندو فالحزب. واش توفرات بعدا فنبعرفة =العثماني ديالهم=
هنا بان بنكيران حزبي بزاف. حزبي مع حزب طعنو فالظهر وباعوه وتخلاو عليه.
فهاد الكلمة هاجم لشكر ادريس ووصفو بالبلطجي ديال السياسة اللي خرج على حزبو. كما هاجم العدل والاحسان متزعمي دعاة المقاطعة. بنكيران عارف انو ربح انتخابات من خلال تصويت متعاطفين مع العدل وان المقاطعة كتعني خسارة اشد للحزب الاسلامي اللي قال غادي يدافع عليه
كلمتو كلها كانت ضد جوج. اخنوش اللي كيبان عندو معطيات انو هو اللي غادي يربح الانتخابات والعدل والاحسان الملاذ الاخير للبي جي دي باش يقدر يقلب المعادلة فالدقائق الاخيرة من هاد الحملة