سيناريوهات التحالف الحكومي: اما ثلاثي بحكومة مركزة فعالة او رباعية او خماسية غادية تكون مهلهلة ومشكلة

البارح بالقصر الملكي بفاس كلف رسميا رئيس الدولة رئيس حزب التجمع الوطني للاحرار بتشكيل الحكومة. رسالة لمغاربة نهار لاربعا واضحة. سيدنا التقطها وبعد ساعات من الاعلان النهائي لنتائج الانتخابات التشريعية والبلدية والجهوية من قبل وزارة الداخلية٬ كلف اخنوش. لمغاربة باغيين التغيير. واقفين عليه بزاف. ما عندهش حل الا التغيير. الازمة ضاربة فينا. الوضعية قاصحة علي جميع المستويات.
اخنوش بعد التعيين قال للصحافة البارح باللي غادي يبدا المشاورات "مع الأحزاب السياسية لتكوين أغلبية حكومية منسجمة ومتماسكة ذات برامج متقاربة". يعني غادي يبدا من اليوم هاد المشاورات. حقاش الوضع يفرض هاد الشي. هو قالها "ابتداء من الان" ايلى ما بداش اولى اتصالاتو البارح فالليل نيت.
قدم رؤيتو لهاد الاغلبية الحكومية: منسجمة ومتماسكة لها برامج متقاربة. دابا هاد الانسجام والتماسك كاين وهي تشكل تحالف ثلاثي: الاحرار والاستقلال والاتحاد الاشتراكي. بثلاثة عندهم اولا اغلبية مريحة. ثم كاين شي تفاوت فالبرامج خاصة بين الاستقلال والاحرار ولكن راه اخنوش نيت قال باللي "يمكن التوافق" فالبرنامج الحكومي. اي كاينة الرغبة باش كل واحد يدير مجهود على هاد البرنامج الحكومي.
بهاد التحالف الثلاثي يقدر اخنوش يحقق اللي كان قالو قبل واللي صرح بيه البارح. قبل قال باللي غادي يجيب الشباب. يعني ان استوزار امثال اوجار والطالبي العلمي وبيرو وبنخضرا ما يمكنش يكونو فهاد الحكومة. خاص الشباب وخاص كذلك بروفيلات "في المستوى، ينفذون الاستراتيجيات الكبرى لجلالة الملك والبرامج الحكومية" كيف اوضح فتصريحو البارح.
فالحقيقة ما خاصش حكومة خاص كوماندو حكومي قوي وفعال. فيه وزيرات ووزراء صغار فالسن. عندهم حتى الصحة باش يخدمو بزاف. هاد الشي ممكن جدا بهاد التحالف.
اما ايلى توسع هاد التحالف ودخلات الاصالة والمعاصرة والحركة الشعبية فراه غادية تولي حكومة مهلهلة شي جر ليمن وشي يجر ليسر وصعيب يتحكم فيها رئيس الحكومة. راه صحاب التراكتور باغيين يدخلو وفرحانين كاع يدخلو ولكن فالحملة الانتخابية هاجمو الاحرار وبعنف خاصة من قبل امينهم العام عبد اللطيف وهبي. دابا يمشيو للمعارضة راها محتاجة لحزب كبير قوي.