مفاجأة برلمان البام. ماشي غير داخلين بصباطهم وحتى امينهم العام بان على حقيقتو. عندو حقيبة وزارية وهو اللي ردد : ما عمرني نكون وزير اما رئيس حكومة واما نرجع نقابل الحزب

دار هاد العشية المجلس الوطني لحزب الاصالة والمعاصرة عن بعد. كان عندو نقطة تتعلق بالمشاركة فالحكومة. قبل ما نهدرو على لقوالب اللي دارت بتكليف جوج عن كل جهة للحديث باسم اعضاء المجلس الوطني لهاديك الجهات٬ نشوفو الحدث الابرز وهو ماشي غير دخول حكومة عزيز اخنوش٬ بل ان الامين العام للحزب عبد اللطيف وهبي حتى هو غادي يدخل.
طبعا كانت شوية السينما وشي كيطالبو يدخل ويشارك فهاد الحكومة وهو يشكر الملك بزافت المرات وكيبين باللي راه زاهد فهاد المنصب ولكن عينو فيه.
قيادي من الحزب قال ل"كود" "وهبي عندو منصب وزاري. اش غادي ياخد. ما عرفناش. ولكن داخل لهاد الحكومة".
هاد وهبي كان قال فالسابق بللي "اما يكون رئيس حكومة =ايلى جا حزبو اللول= او يخلي ناس خراين فالحزب يدخلو للحكومة ويمشي يقابل الحزب =الامانة العامة= كما قال باللي ما صالحش يكون وزير. وفلقاء اخر قال باللي يرفض يكون وزير فحكومة اخنوش.
كلشي طلع غير كذوب بحال هاداك الشعار ديال حملتهم "بالمعقول نزيدو القدام" خاصو يتغير "بتغيير المواقف ناخدو لكراسا".
نرجعو لاحتجاجات باميين على طريقة تعيين جوج من كل جهة من الجهات 12 باش يتكلمو ويقررو فقضية دخول الحكومة. مصدر "كود" قال باللي هادي تقررات غير 48 ساعة قبل من انعقاد المجلس وباللي يستحيل هاد العضوين يتكلمو مع كافة الاعضاء. يعني كلشي غير شكلي وصافي.
مصدر "كود" قال: "قبل ما نديرو المجلس كنا عارفين قرار المشاركة. راه كيتلاقى يوميا مع رئيس الحكومة المعين". يعني راه المفاوضات تقدمات والمشاركة تحسمات.