3 سنين متابعة وهو ماعايقش.. موظفة ف أجونص دو ڤواياج ضربات فلوس صحيحة على ظهر رونالدو

تعرض الكوايري البرتغالي كريستيانو رونالدو هاد 3 سنين اللي دازت للشفرة على يد موظفة خدامة في أجونص دو ڤواياج سميتها "Geostar".
السيدة اللي في عمرها 53 عام نظمات أكثر من 200 رحلة وهمية وكلهم ريزيرڤاتهم بسمية رونالدو، حيث كان شي وقت عطاهم الكودات ديال ليكارط بونكير ديالو، وهكذا نجحات فالمدة ديال 3 سنين متابعة (بين فبراير 2007 و يوليوز 2010) باش تاخد 288 ألف يورو. ووخا هكاك ماردش البال و ماكانش حاس بللي هاد المبلغ تهز أو مشا ليه.
الموظفة شفرات حتى خورخي مينديز اللي هو وكيل بزاف ديال الكوايرية العالميين والكوايري ناني ومانويل فرنانديز وهادو كاملين من البرتغال.
السيدة شدوها البوليس ودابا غاتدوز 4 سنين ديال الحبس.