الصحة العامة تسمو على صحة الفرد

فى مرحلة حرجة بحال اللي كنعيشو اليوما من حق الدولة تتاخد التدابير اللازمة اللي كتشوفها مناسبة، مع مراعاة جميع الجوانب لا من الناحية الاقتصادية، النفسية أو الاجتماعية إلخ، لأن السلامة العامة، سلامة النظام العام أو درء الخطر كتعتابر من أولويات الدولة المسؤولة، أو إيلا قامت الدولة بتقييد بعض الحقوق أو الحريات بغية تحقيق المصلحة العامة، هادا "أمر محمود"، أمّا إيجي شي واحد أو إقول: "ذاتي هادي، نعمل بيها اللي بغيت"، مع كل احترامي لهاد الفئة اللي رافضة لا جواز التلقيح ولا ّ حتى التلقيح أصلا ً، هادي أنانية مفرطة غير مقبولة، واش فى صالحنا كولنا نخليوْ الوباء كيعمل اللي بغى؟ لأن هاداك اللي حامل العدوى، عن قصد أوْ غير قصد، غادي ياخدو معاه فى الطوبيس، الطاكسي، الطرام، الكار، التران، أو إفرّقو على جميع الإدارات أو المؤسسات العمومية، القهاوي، لوطيلات، الحمامات، الشركات إلخ أو ينشرو فى جميع المدون المغربية، هاد التصرف، ما هو لا حضاري، لا منطقي ولا وطني.
حرية الفرد، مرحبا أو آلف مرحبا فى الأيام العادية، ولكن فى حالة الطوارئ هاديك هضرة خرى، خصنا نتحلاو بالموضوعية أو الواقعية، كاين حتى اللي عندو الحق ياخود الجرعة التالتة أو باقي كيخروج يحتج ضد جواز التلقيح، كيقول ليك: "أنا ماشي ضد التلقيح، ولكن ضد إجبارية التلقيح"، نتبعوه في حماقو: لنفرض تلقح هاد الشخص، كيفاش غادي يثبت بأنه ملقح؟ غير خودها من عندي؟ مع العلم أنه كنعرفوا كلنا أنه عندها مشكل مع الحقيقة أو الصدق، جميع الدراسات الحديثة بينات أن الجرعة التالتة عندها فعالية كبيرة، لأنها ماشي غير جرعة تكميلية ولاكن كتحصّن نسبة كبيرة من المناعة.
من البديهي أن التطعيمات الأساسية كتضمحل مع الوقت، حسب دراسة اللي قاموا بيها خبراء إسرائليين، البحث العلمي ما كيعرف جنسية ولا ّ حدود، أنه كتقلص المناعة بسرعة رهيبة بالنسبة لجميع الفئات العمرية، علاش إسرائيل؟ لأنهم هوما اللي لقحوا أكبر عدد فى العالم بالجرعة التالتة، لا فوق من 70 ولا ّ تحت منها، أو جراو بحوث أو دراسات رصينة اللي لاحظوا إثرها أن الجرعة التالتة فعالة عشرين مرة على التانية، لأن التطعيم التالت غادي إصادف جهاز مناعي قوي (لانسيت، 2021).
أو إيلا كانت المناعة متوفرة عند هاد الناس غادي تتقلص بنسبة كبيرة العدوى، اللي فاتوا السبعين ولا ّ المناعة ديالهم هشيشة أو ما حصّنوش صحتهم بتلقيح تالت المخاطرة غادي تكون أكبر من اللي ختار التطعيم، بالنسبة اللي خداوْ "فايزر" أو كانوا كينتاميوْا للفئة العمرية من 40 عام الفوق الإيجابيات كانت كبر من السلبيات، أصلا ً كون ما كانش التلقيح الطايح غادي إكون كثر من الواقف، كيف كان حاصل من قبل، الهند مثلا لما كانوا كيحرقوا الجثث بطريقة عشوائية على جناب الطريق، دابا ما بقينا كنسمعوا عليهم والو، حتى على الطاليان اللي متاخدة لحد الآن قوانين صارمة أو كتفرض عقوبات خيالية، كيف كنقولوا: سوّل المجرّب لا تسوّل الطبيب، الطبيب غير سمع أو دوّز يدّيه ولا ّ السكانير، أما صاحب الداء كيحسّ بالعافية من الداخل.
عندي سؤال بسيط بالنسبة للهادوك اللي كيحتجوا أو جعلوا من الاحتجاج "سياحة ترفيهية": "شنو قدّمتو نتوما للبشرية بعدا"؟ الاحتجاجات السلمية مكفولة فى إطار القوانين الجاري بيها العمل، يمكن لييا نفهم الاحتجاجات ضد غلاء بعض أسعار المواد الغذائية، ولاكن تحتج باش تنشر الوباء أو تقتل الناس، فهادا لا يعقل! المياوات ديال الملاين تصابوا فى العالم أو حنا نعطيوا للهاد الوباء اللعين "فرصة من ذهب" باش يقتل الحباب أو الصحاب؟ الله يهديكم رجعوا للرشدكم، راحنا فى سفينة وحدة، غير نغرقوا كولّنا ولا ّ ننجاوْا كولنا، كاين عالم مريكينا باقي قابع فى الدار هادي عاماين، لأنه كيعاني من نقص المناعة الأولية، شنو؟ نقتلوا هادا اللي كيفيد بعدا بتصرفاتنا الطائشة أو الغير المسؤولة؟ العلم نور، أما الجهل مصيبة.
ما حدّنا ما عندنا دوى، ما كاين غير التدابير الاحترازية أو جواز التلقيح باش يمكن لينا نرجعوا للحياتنا شبه العادية أو ما نشروه العدوى، أو حتى إيلا عادينا بعضياتنا غادي تكون الاعراض خفيفة، على ما كايبان كاين شي دوى فعّال صنعاتو شركة "فايزار"، قدّمات "ديجا" طلب قصد الترخيص من طرف المصلحة الخاصة بالأدوية فى الولايات الأمريكية، حسب أقوال الدكتور "ميكاييل دولستان": "بعد تلت أيام من ظهور الأعراض يمكن تصول الوقاية حتى %89، أو حسب المعطيات اللي توصّلنا ليها غادي يحمي هاد الدوى حتى %100 من الموت، أو حتى إيلا تصاب بنادم أو خدا الدوى من بعد 5 أيام، الوقاية كتكون فى حدود %85،" حتى %80 غير آرى، لأن باقي هاد الملعون كيحصد فى الأرواح، أو الوضع باقي ما مستقرّش، غير لوح عوينة جهة أروروبا فاين عاملة الموجة الرابعة خبلة، تعلّي صوتك، تزبد أو ترعض مسألة ساهلة، ولاكن تقنع بالحجة العلمية أو الدليل هاديك هضرة أخرى.