الحوت القضيبي اللي بغى يطلعو رئيس بلدية المهدية لسكانو وللمغاربة. غير تصريحو خاصو يتابع بيه وكان غادي يدير موسيقى تركية واييه اما اللي صاوب داك لعجب بان مرفوع عليه القلم

فضيحة الحوت القضيبي اللي حطو الاستقلالي عبد الرحيم بوراس رئيس بلدية المهدية فرونبوان فالمدينة ودار شوهة ماشي على انو كيشبه قضيب وصافي اللا حقاش كذبة وتخربيقة.
الاستقلالي بخرج بوقاحة كيكذب علي لمغاربة. اول كذبة قال باللي بغى يعطي فرصة لولد الشعب. كيقصد بيه هاداك اللي دار داك لعجب. عطيه فرصة فدارك بفلوسك. ماشي فملك المدينة ولمغاربة حقاش كيدوزو من ديك لبلاصة. ثانيا قال باللي ما كلف والو غير داك السيد طلب من الجماعة تعطيه فرصة. هاد الشي خطير. حقاش فيه استخفاف بمالية البلدية اي الشعب وتدبير متخلف. كيفاش ولاد الشعب. شكون قال ليك تقولها. راه كاع لمغاربة ولاد الشعب. اكبر نحات فالمغرب اللي هو الوزاني وكيدير نحت فيه السمك راه ولد الشعب.
قال٬ ثالثا: باللي تلبية للمواطنين حيد هاد العجب. اش من مواطنين. انت منتخب فالمهدية. كتهدر عليهم ولا على شعب الفايس.
وشي حد قراه اش يقول وقال غادي يدير مباراة افكار. انت خاصك تتحاسب على هاد الجريمة اللي درتي. راها جريمة تمس بالمدينة ماشي على الحوت القضيبي اللا. على الطريقة باش تصرفتي. لا مسطرة تبعتيها لا اجراءات لا حتى حاجة.
بلا ما نهدرو على كذبة لفلوس. قال باللي فابور. وفينك يا وزير الداخلية ويا المعارضة ويا الجهة. راه فضايح وقعو على الحوت القضيبي.
دابا اجيو نشوفو اللي صايب لعجب. خرج كيكبي وكيقول للمغاربة ظلموني وحكمو على خدمتي قبل ما تكمل. السيد بان مرفوع عليه القلم فنيا. لحسن الحظ سالات هاد الجريمة الفنية غير فالقضيب. راه قال ليك مازال السلسول ديال الحوت فالدار. اييه هاد الشي اللي كتسمعو. قالها. هو اللي يقدر يشرح هاد الشي. وقال باللي كان باغي يدير الصم ديال خنيفرة والما والموسيقى التركية. واييه الموسيقى التركية.
قال باللي صايب حمار ماشي خلقو اللي ابداع زعما وعطاتو شي اجنبية مليون ونص وشرا بيها موطور. اللي دار فيه راسو هو اللي خاصو يتحاكم.