وزير الميزانية ما حضرش لاجتماع وزيرة المالية مع الباطرونا. فتاح: نشكر الروح البناءة للباطرونا ولعلج: برافو للحكومة على 13 مليار درهم لأداء مستحقات التي ڤي أ للمقاولات

فوزي لقجع الوزير المنتدب لدى وزيرة الاقتصاد والمالية ما حضرش لاجتماع المجلس الوطني للمقاولة التابع للاتحاد العام للمقاولات بالمغرب.
الاجتماع اللي جات ليه نادية فتاح وزير المالية ومعها مدراء مركزيون فالوزارة وتلاقات مع الباطرونا٬ ما جاهش لقجع.
ظاهريا كان عندو اجتماع اخر فالرباط اكثر اهمية من هاد الاجتماع. غير اللي معروف على وزير الميزانية انو ما عندوش بزاف مع هاد العينة من الاجتماعات السنوية اللي كيتكرر فيها تقريبا نفس الهدرة.
النقاشات كتكون فالبرلمان والباطرونا عندهم فريق فمجلس المستشارين وكيقدمو ملاحظاتهم وتعديلاتهم على قانون المالية.
فتاح كانت قالت للصحافة بعد الاجتماع باللي خاص نثيقو "فالقوى الحية لبلدنا، رجالا ونساء، للخروج من هذه الأزمة بشكل أقوى وتحقيق انتعاشة لاقتصادنا".
ونوهات بما سمته "الروح البناءة والتعبئة التي أبان عنها الاتحاد العام لمقاولات المغرب من أجل دعم جميع القطاعات التي كانت تعاني خلال الأزمة الاقتصادية، وكذا الفاعلين المغاربة الذين أبدوا مرونة وابتكارا وإبداعا، مما مكن من إجراء "مناقشات رصينة".
طبعا فهاد الاجتماع كتكون تعديلات كتقدمها الباطرونا للوزيرة وهدرة على المشاكل اللي كتعيشها المقاولة.
فهاد الاجتماع شكيب لعلج رئيس الإتحاد العام لمقاولات المغرب نوه بما سماه "الإشارات الإيجابية للحكومة الموجهة للقطاع الخاص، ولا سيما إعلان رئيس الحكومة عن ضخ 13 مليار درهم لأداء مستحقات الضريبة على القيمة المضافة بحلول أبريل 2022".
وقال باللي هاد الشي غادي يكون عندو "وقع ايجابي على التوازنات المالية للمقاولات وسيمكنها من الاضطلاع بدورها الأساسي المتمثل في الاستثمار" وغادي يبعث الروح والامل ويشكل "بداية جيدة نحو حيادية الضريبة على القيمة المضافة".