وزارة الصحة كدير مهام الخارجية فالازمة المغربية الاسبانية. بيان قوي ضربت بيه سلطات مدريد واخا الاجراءات اللي كطبق تماك بحالها بحال اللي كطبق فمطاراتنا

بيان وزارة الصحة البارح فالليل على استثناء اسبانيا من الرحلات باش يرجعو لمغاربة ظاهرو "صحي" ولكن فعمقو سياسي. البارح كتبو لمغاربة اللي ساكنين فالعيون وحاصلين بلاس بالماس رسائل استعطاف الى الديوان الملكي ووزرارات اخرى فيها شرحو ظروفهم وطلبو يرجعو. فالليل جاوباتهم وزارة الصحة: اللا ما يمكنش نديرو رحلات جوية من اسبانيا للمغرب.
التبرير اللي دارتو وزارة الصحة فبيانها البارح فالليل هو "غياب ضمانات ملموسة على احترام هذه الإجراءات، من بينها مراقبة جواز التلقيح، والحالة الصحية للمسافرين، بطريقة حازمة وسليمة طبقا للتوصيات والإجراءات الصحية المتعارف عليها دوليا"
ومشات بعيد وقالت باللي "وضعية السفر من إسبانيا إلى المغرب، تشكل خطرا على صحة المغاربة، وضربا للمكتسبات الصحية اللي حققها ف مجال التصدي لانتشار فيروس "كوڤيد 19"
وزارة الصحة تحولات لوسيلة هجوم على الصبليون باش زادت "السلطات الإسبانية المعنية لا تعمل على المراقبة بالشكل المطلوب والصارم للحالة الصحية للمسافرين أثناء عملية الإركاب عبر المطارات" وباللي المغرب لقى حالات كوفيد جات فرحلات خاصة.
علاش الهجوم؟ هاد الشي عندو مبرر سياسي. وزارة الصحة كتكذب فهاد البيان. اولا الرحلات الخاصة ماشي قياس. هادا راه وزارة الخارجية اللي كتعطي رخص استثنائية. يعني المغرب باش فتح عودة للمغاربة مادارش معاهم الصبليون. ثانيا٬ وزارة الصحة كانت خاصها تقول لينا شكون اللي سمحات ليهم الخارجية يدخلو فطيارات خاصة ولقاو فيهم كورونا.
لكن الاهم من هاد الشي كولو ان الاجراءات فمطارات اسبانيا اكثر تشدد كاع من الاجراءات المتعلقة بالمراقبة. تدخل لمطار اسباني ممنوع تحيد الماسك حتى تخرج منو. الماسك اجباري بصاح ماشي اجباري بحال ديالنا. ثم اللي كيراقب التيست بي سي ار عندهم بحالنا: شركة الطيران. باش تبغي تسجل كتعطي البي سي ار ديالك وقانونهم ما كيسمحش فاطار حماية المعطيات الشخصية٬ الا تسجيل اسم الطبيب وتاريخ اجراء التيست زائد واش "نيگاتيف" ولا "بوزيتيف". هنا فمطارات المغرب ايلى كنتي مسافر مع لارام" لاسبانيا راها هي اللي كتقلب ليك التيست ايلى كان خاصك ديرو٬ حقاش هما كيطلبو بي سي ار او الڤاكسان.
هاد الشي علاش بيان وزارة الصحة فيه ريحة السياسة. مازال الازمة المغربية الاسبانية. مازال الما ما دازش بيناتهم كيف كنا كنتوقعو. راه البروطوكول باش ترجع لمغاربة كان ممكن ديرو لارام او ايبيريا بصرامة كيف ديما. تبرير وزارة الصحة باش ما ترجعش لمغاربة اللي حاصلين فالصبليون ضعيف بزاف بزاف. فالحقيقة ما شادش گاع.