فضيحة جديدة بوزارة بنموسى. سكن وظيفي بالملايين تفوت لمسؤول سامي لا علاقة له بالوزارة و 29 مسؤول باقي هارف على ديور الخدمة

علمت "كود" أن الكاتب العام للمجلس الاقتصادي و الاجتماعي، يونس بنعكي، قطع شوطا كبير في مسطرة تفويت السكن الوظيفي الذي يشغله بمركز التخطيط والتوجيه بالرباط، فالوقت اللي كتحدث مصادر موثوقة ل"كود" ان عملية التفويت في مراحلها الأخيرة، و أن الأمر ينطوي على خرق مسطري كبير، وتجاهل لدورية رئيس الحكومة السابق سعد الدين العثماني اللي حث على فتح مباشرة مسطرة التفويت ولكن وفق معايير شفافة ومعقولة وللجميع ماشي لموظفي خمس نجوم.
بنعكي الذي شغل سابقا مدير الميزانية بوزارة التربية الوطنية منذ عهد العابدة إلى أن غادر الوزارة سنة 2019، توصل برسالة لإفراغ السكن الوظيفي في مناسبتين من طرف امزازي، ومنذ ذلك الحين، لجأ إلى طرق الأبواب للاستفادة من مسطرة التفويت، بشكل شخصي.
هاذ السكن اللي شاد بنعكي، المساحة ديالو 1500 متر ، ويقع بموقع عندو جاذبية كبيرة بقلب حي الرياض ويصل ثمن المتر مربع تما ل 30 ألف درهم، يعني بعملية ساهلة غي ثمن العقار اكثر من 3 ملاير ونص. هاذ الشي اللي واقع فسكنيات التعليم خاصة الريوس الكبيرة عبث كبير وريع لا حدود له.
السؤال المطروح هو شكون وقع لبنعكي وثائق التزود بعدادات شخصية للماء و الكهرباء وهو مبقاش عندو تا علاقة بالوزارة، و اللي القوانين و المذكرات ديالها تفرض على الموظف إفراغ السكن بمجرد الإحالة على التقاعد، الاستقالة، أو مغادرة القطاع. وكيفما كان الحال السكن اللي شاد بنعكي تابع لمركز التوجيه و التخطيط اللي هو المركز الوحيد فالمغرب، و اللي هو فالاساس مخصص لموظفي المركز، خاصة و أن مسؤولي المركز مساكنينش.
هاذ القضية ديال السكن الوظيفي حتا هيا باب كبير من أبواب الريع، كيفاش مسؤولين تقاعدوا هاذي 5 سنين و10 سنين ومازال هارفين على السكن، وكاين فيهم الي كتخلص عليه الدولة الما و الضو، وكاين اللي دايرو غي سكن ثانوي فإطار الزكير، وكاين اللي كيقصر فيه فالوقت اللي السكن الوظيفي مرتبط بممارسة الوظيفة وملي تقاعد ولا تمشي خاص الواحد يخلي موظف آخر يستافد باش يخدم فظروف مريحة ويكون أكثر مردودية.
الاخبار اللي جابت "كود" كتقول أن 29 مسؤول سامي ضمنهم مدراء مركزيون، ومفتش عام استقال، ومدراء أكاديميات سابقين، ومدراء إقليميين متقاعدين، يحتلون سكنيات وظيفية بمواقع ذات جاذبية بالرباط، ويستفيدون من تواطؤ كبار مسؤولي الوزارة وفي مقدمتهم الكاتب العام اللي سنويا كيخرج مذكرة إفراغ السكنيات الوظيفية و تحيين الإحصاء ديالها، وطبعا الكاتب العام كيقصد الاعوان و الحراس العامين و المدراء و المقتصدين اما نخبة الوزارة فهي غير معنية بتطبيق مقتضيات المذكرة 40.
الكرة الان في ملعب بنموسى لتحصين وحماية ممتلكات الوزارة، و إذا كان ضروريا تفويتها فيجب استحضار الصالح العام وتطعيم موارد الوزارة ماليا لمباشرة ورش الإصلاح.