ترونات فالبرلمان. أوزين هاجم بشدة وهبي ورئيس فريق البام المتابع فجرائم الأموال رون الجلسة وضيع الوقت.. والطالبي لبوانو: كتنقز

هاجم محمد اوزين، البرلماني القيادي في الحركة الشعبية، بشدة عبد اللطيف وهبي، وزير العدل، ومخلاش فيه.
هادشي خلا رئيس فريق البام لي عندو ملفات جرائم الأموال فمراكش، ناض كيغوت وفشل الجلسة ودخلو فمناوشات سياسية، لدرجة جبد لاوزين قضية الكراطة.
اوزين قال بلي "شي وحدين ملي كتجبد ليهم وزير العدل كتشدهم الهستيريا حيث عارفينهم علاش كيدافعو"، مضيفا "ماتبنات تا محكمة فالمغرب وغارقين بلا شتا ولا كراطة".
تدخل رئيس الجلسة الطالبي العلمي، باش يضبط الجلسة تسبب فالمزيد من الاحتقان داخل الجلسة خصوصا فاش ناض عبد الله بوانو رئيس مجموعة العدالة والتنمية خدا كلمة باش مايعطيها لو الطالبي. هاد الصداع وصل لدرجة وصف بوانو بأنه "كينقز".
الطالبي قال لبوانو:" خديتي كلمة بلا اذن وهادي اكبر إهانة للمجلس".
اوزين رجع وقال :"الحكومة تمتلك كل شيء إلا السياسة، الغريب من تحولت من سرعة الضوء في تشكيل الحكومة والحصول على المناصب واعداد قانون مالية بسرعة، وتم نفخ الأرقام باتفاقيات وبديتو كتسحبو مشاريع قوانين، وقدمنا كمعارضة اكثر من 20 مشروع قانون دون تستجيب له".
واضاف اوزين "شي وحدين تدخلو وقالو نحاربو الفكر الوهابي وحاربو غير الفكر الوهبي".
واستغرب اوزين من مكتب سياسي لحزب مشارك فالحكومة يدعو الحكومة لفتح الحدود، هنا كيقصد البام.
فكواليس الجلسة، فاش سالات كلمة اوزين ناض ثاني رئيس فريق البام لي ديما منوض الصداع، وهاجم اوزين. الاخير رد عليه بالقول :"راك نتا تما كدافع على وزيرك حيث عندك ملفات وحنا غانرجعو ليها".