كلشي غادي يزيد يشعل من الگمح حتى البترول والغاز. بوتين حظر استيراد وتصدير المنتجات والمواد الخام من والى روسيا ف2022

تبعات الغزو الروسي لاوكرانيا كل نهار كيكون فيه الجديد وغير لخبار الخايبة. قصف وقتل وهجرة بزز. اليوم وقع الرئيس الروسي فرد على امريكا والغرب٬ على مرسوم غادي يكون عندو تبعات علينا وعلى العالم كولو. وفق وكالة تاس الروسية فالرئيس وقع مرسوم كيخص تطبيق تدابير اقتصادية كتهم التجارة الخارجية. التبرير اللي تعطى هو "ضمان أمن روسيا".
هاد المرسوم فيه حظر استيراد المنتجات والمواد الخام من والى روسيا فهاد العام اي 2022 وخلى لمجلس الوزراء يحدد هاد القائمة وعطاهم يومين.
هاد القرار جا ردة فعل علي اللي كتوجدو امريكا وبريطانيا. وسائل اعلام هدرات على قرب اعلان واشنطن حظر استيراد كل من النفط والغاز والفحم من روسيا. بريطانيا بدات تتخلى على صادراتها من روسيا.
هاد الشي غادي يشعل العافية فاسعار الغاز والنفط. كاينة دول بحال فلندا ولتوانيا كلشي صادراتها من الغاز من روسيا. 100 فالمائة. وكاين دول بحال المانيا كثر من 40 بالمائة من حاجياتها من النفط من روسيا. اوربا ايلى حظاها النفط الروسي تعيش ازمة كبيرة. 40 فالمائة من حاجياتها من روسيا.
الاوربيون واخا قالو باللي غاديين يبقاو يستوردو النفط الروسي وحتى البترول واخا دير امريكا الحظر ولكن قرار بوتين اليوم غادي يخربق كلشي. الثمن ديال برميل البترول كيوصل 200 دولار