هنا خاص الحكومة تبين على حنة يدها والا ناضت فالبلاد. صحاب الترانسبور دارو 20 فالمائة زيادة وماليين المخبزات باغيين يحررو ثمن الخبز

فهاد ليام جوجت القطاعات استراتيجية قررات من طرف واحد تاخد قرارات غادية تنوضها فالبلاد. البارح صحاب الترانسبور قررو يزيدو 20 في المائة فثمن النقل. قبلو كانت جمعية المخابز هدرات على تحرير ثمن الخبز باش ما يبقاش ب24 ريال.
بيان الجمعية المغربية للنقل واللوجيستيك البارح كان واضح اكثر من بيان المخابز. هادو قالو غاديين يزيدو 20 فالمائة حقاش ثمن الگازوال فات 10 الدراهم. هاد الجمعية اللي تابعة لفيدرالية النقل واللوجيستيك المنضوية تحت الباطرونا٬ خدات هاد القرار اللي غادي يؤثر علي كلشي.
ردت الفيدرالية المغربية للمخابز والحلويات على تصريح الناطق الرسمي باسم الحكومة مصطفى بايتاس٬ وقالت باللي كتدرس للي تدرس تحرير ثمن الخبز من طرف واحد
وكان بايتاس قال الخميس اللي فات باللي الحكومة تدعم تثبيت الثمن المرجعي للخبز ف24 ريال بغلاف مالي شهري كيوصل ل50 مليار سنتيم وقال البيان التوضيحي ان هاد التصريح كيعطي انطباغ مغلوط باللي المخابز كتلقى دعم باش تخلي هاد الثمن
الفيدرالية قالت ان المخابز لا تتلقى اي دعم عمومي وانها تتحمل كل المصاريف والزيادات هادي عشرين عام
وان ما تمنحه الحكومة كيمشي للصناعة التحويلية لوحدات المطاحن.
ودعت الفيدرالية الى تشكيل لجنة تقصي الحقائق حول الدعم المخصص لدعم استيراد وتخزين وتحويل الحبوب
وتأهيل وتنمية قطاع المخابز
هاد القرارات فيها اللي كيعارض مواقف الحكومة بحال قضية ثمن الخبز وفيها اللي اتخاد من طرف واحد بحال ديال النقل.
مهمة الحكومة اليوم مع هاد الزيادة فثمن المحروقات عالميا بسبب الاقبال لكبير عليها وتبعات غزو روسيا المحتمل لاوكرانيا٬ هو تلقى حلول. خدمتها هي هادي.
دابا خاصها اولا تشرح وتوضح وتفسر ثم تواجه اي جهة فقطاع المخابز او النقل اللي كتلاعب بالدعم كيف جا فبيان هاد الجمعيات.