ها نتائج التعامل الغبي لوزير التعليم العالي مع طلبة أوكرانيا.. ناضو كيطلبى سيدنا يدخلهم لكليات الطب ومعاهد الهندسة بلا شروط ولا امتحانات حيث عندهم شويا د الفلوس وباغين يهينو الطلبة لي دخلو بكفاءة وبنقط عالية ويتساواو معهم

نتائج التدبير الكارثي لملف الطلبة العائدين من أوكرانيا، بدات كتبان وللي كيتحمل فيها المسؤولية وزير التعليم العالي والبحث العلمي والابتكار ، البامي عبد اللطيف ميراوي، هاد الوزير خدا قرار انفرادي بادماج الطلبة المغاربة العائدين من أوكرانيا عبر منصة إلكترونية، متشاورش مع حد ولا مع أي قطاع حكومي.
دبا الطلبة اليوم ناضو دارو وقفة احتجاجية قدام وزارة التعليم العالي ومدخلين سيدنا فالموضوع، وطالبو منو يتدخل باش يستجلو فكليات الطب ومعاهد الهندسة بدون قيود أو شروط أو امتحانات.
هادي سابقة باش طلب دخل لجامعة مغربية ومعهد مغربي بلا كونكور، في حين الآلاف من الطلبة المغاربة لي جابو نقط مزيانة وتكرفصو ودوزو كونكور وسهرو ليالي باش يكون عندهم حظ يتسجلو فكليات الطب والمعاهد العليا، هادي إهانة لهم إهانة لجهودهم إهانة لكفائتهم.
اولا الملك مكيتدخلش باش يسجل الطلبة فالمعاهد والكليات، الملك دار توجيهات باش يرجعوهم من الحرب لحمايتهم ودارو معهم تسهيلات للرجوع، ولكن إقحام سيدنا ف قضية خصها لجنة خبراء ونقاش حول البيداغوجيا والمسالك ولغة التدريس، هادي رآه قلة احترام للمؤسسات.
الغريب هو السوبر وزير البامي ميراوي، لي باغي يدير ما بغا فالتعليم العالي خصوصا التخصص لي عندو علاقة بالصحة، القطاع الحساس فالمغرب، فبعدما نقص سنوات التكوين من 7 إلى 6 سنوات بالنسبة لطلبة الطب بلا مايتشاور مع القطاع المعنى (الصحة) ، اليوم باغي يدمج الطلبة المغاربة لي رجعو من أوكرانيا بسبب الحرب.
هاد الادماج جا بعد ضغط كبير دارتو الأسر ديالهم على وزارة التعليم العالي، خلا الحكومة تحط خيارات عديدة للتعامل مع ملف الطلبة العائدين من أوكرانيا، من بينها "فتح حوار مع الدول المجاورة من أجل متابعة دراستهم هناك، أو العمل على إدماجهم في الجامعات المغربية.
واخا كاينين خيارات، الوزير البام باغي يدمجهم واخا هادشي كيتناقض مع مبدأ تكافؤ الفرص والمساواة حيث ميمكنش تقارن واحد تقاتل وجاب 17 فالباك ودوز كونكور لكلية الطب مع واحد جاب 10 أو 11 ومشا لأوكرانيا يقرا بالفلوس.
مصدر مقرب من مسؤول حكومي، قال ل"گود" لا يعقل إدماجهم بطريقة مباشرة، لا يعقل وزير مكيتشاور مع حد وداير قرارات انفرادية فموضوع خاصو لجنة من الخبراء ومن اساتدة كليات الطب هي لي تقدر تعطي شنو لي ممكن يدار، وخصوصا وأن المسار ديال دراسة الطب في أوكرانيا مختلف تماما مع المغرب، والمغرب كيقري بالفرنسية، ميمكنش إدماجهم.
يشار إلى أن وزارة التعليم العالي والبحث العلمي والابتكار أطلقت منصة إلكترونية أقبل على التسجيل بها 4885 طالبا إلى حدود الأسبوع الماضي، منهم 3744 طالبا، بنسبة 77 في المائة، يتابعون دراستهم في تخصصات الطب والصيدلة وطب الأسنان، بينهم 220 طالبا في طور التخصص. حتا هاد المنصة قرار انفرادي.
وزير داير راسو انا بوحدي لي نقدر نفك مشكل هاد الطلبة، وقرارو متسرع ودبا كاينين طلبة رجعو كيقراو عن بعد..