دار پرومو للسياحة بطريقة أخرى.. ميريكاني تفاجأ من تكلفة العلاج الرخيص فصبيطارت المغرب – تغريدة وفيديو

بلوكَور ميريكاني سميتو كريستيان كَروسي (Christian Grossi) دار البوز فالعالم، بعدما نشر فيديو فمواقع التواصل الاجتماعي، لقا تفاعل كبير وشافوه جوج دالمليون من الأشخاص، كيعاود فيه على تجربتو فصبيطار فالمغرب اللي كلفاتو حصة علاجية فيه حوالي 31 دولار فقط، واللي جاتو مناسبة بزاف.
https://www.tiktok.com/@christian.grossi/video/7102524678144658734
كَروسي، اللي عندو 23 عام واللي كيدير حاليا جولة فالمغرب، مافهم والو فاللول من الفاكتورة اللي خلص فالصبيطار اللي تداوا فيه من تسمم جاه بسباب شي حاجة كلاها فالزنقة، وقال بللي كان كيتسنى شي مبلغ خيالي.
https://www.instagram.com/reel/CeRL9gdKWQm/?utm_source=ig_web_copy_link
البلوكَور الميريكاني قال بللي دوز 24 ساعة فالصبيطار، داوه ليه الناس بعدما طاح سخفان فالشارع، وتما تكلفو بيه وعطاوه الدوا ودارو ليه التحاليل اللازمة، بحال ديال الدم، وهادشي اللي فالعادة كيكون مكلف فبلادو ميريكان بزاف بحكم أن كل الخدمات الاجتماعية ومنها خدمات قطاع الصحة غالية بزاف وكلها مخوصصة، ولكن فاللخر، كَروسي، طلعات عليه الزيارة للصبيطار مغربي بمبلغ اللي كيشوفو هو مناسب و رخيص.
https://m.youtube.com/shorts/fqlNo1vLe-0