ودابا جريو على وحيد. ها هو اهلكم للمونديال الافريقي وقبل الوقت. هاد الماتش كان تاريخي عند حكيمي لهاد الاسباب

باش بدا ماتش الليلة بين ليبيريا والمنتخب المغربي لكرة القدم بملعب محمد الخامس فكازا عن الجولة الثانية من تصفيات كأس افريقيا للامم الكوت ديفوار 2023 كيخليوك اللعابة تحس باللي كلشي مفاهم باش ما يلعبوش مزيان.
الطريقة باش لعبو بيها الشوط الاول وسالى بزيرو لزيرو بانت فشي شكل. ما كاينش الحماس ولا الاندفاع ولا الرغبة يمشيو للبوطو. لعبو مع فرقة مهلهلة ضعيفة تالفة. جات تلعب اللور وصافي. كون غير شوية الزعامة كون مشاو للشبكة.
وحيد فهاد الماتش دخل فرقة تقريبا جديدة. لعب يحى عطية الله وجبران من الوداد من اللول. دخل فيصل فجر حتى هو من اللول ولعب مايي فالدفاع حدا غانم سايس اللي خرج فالدوزيام ميطا بعد ما تضرب.
فالميطا اللولى ما داروش لمغاربة حتى شي اوكازيون واعرة. دخل بجوج مهاجمين: النصيري والكعبي ولكن ما وصلهم والو. ولا كورة شايطة.
المشكلة ماشي فالوسط الهجومي بل فكاع اللعابة اللي كتحس بيهم تنقل ليهم الجو المسموم اللي كاين برا التيران بخصوص استمرار المدرب وحيد من عدمو.
فالدوزيام ميطا ما كانوش بزافت الفرص ولكن ماركا الاسود بيلانتي جابو امين حاريث ومن بعد جات اوكازيون زوينة. كورة عطاها اوناحي وماركاها النصيري. هاد البيت احسن ما دار فهاد الماتش
اليوم صعب بزاف وحيد على الجامعة باش تتخلى عليه. كلشي كان موجد باش يمشي فحالو او يخرجوه من الباب الصغير واخا اهلنا لكأس العالم والليلة تقريبا اهلنا لكاس افريقيا للامم بالكوت ديفوار 2023.
من لحوايج اللي وقعات الليلة هو انو لاول مرة حكيمي هز الشرويطة. كان ف45 دقيقة كابيتان للاسود بعد مغادرة غانم سايس للتيران بسباب الاصابة. تزامن هاد الحدث مع الماتش 50 لهاد اللعاب لكبير