قاضي التحقيق فجنايات سطات هبط 3 من العصابة اللي هجمات على قهوة ف"ولاد سعيد" باش تصفيها لمستشار جماعي

قاضي التحقيق بمحكمة الاستئناف بمدينة سطات البارح في العشية أمر بإيداع 3 أشخاص السجن من بينهم مستشار جماعي من الأغلبية المسيرة لجماعة "ولاد سعيد"، وذلك بعدما متابعتهم بتهم تتعلق بتكوين عصابة إجرامية و المشاركة في السرقة الموصوفة وفي الضرب والجرح بواسطة السلاح الأبيض و إلحاق خسائر بملك الغير.
قرار قاضي التحقيق جا بعدما قدمات عناصر المركز القضائي بسرية درك سطات المتهمين بعد زوال يوم أمس الأربعاء أمام الوكيل العام بجنايات سطات بموجب صك الاتهام. وبعد استنطاق الوكيل العام للمتهمين أحالهم على قاضي التحقيق وبعد ااستنطاقهم ابتداء تابعهم فحالة اعتقال.
هاد الفيلم بدا حينما هجمات واحد العصابة، كلهم ملثمين، (هجمات) بالسيوفا على قهوة ف"ولاد سعيد" فإقليم سطات، اللي كاينة فالسطاسيون ديال تما، وجبدو السيوفا على الكليان وكانو جايين باغيين يصفيوها لشي مستشار جماعي تما ولقاو غير خوه اللي خوا عليهم وهرب.
كتقول مصادر خاصة ل"گود" أن هاد الفعل عندو أهداف سياسوية وتصفية حسابات فهاد الاتجاه.
ومن بعد الحادث دارو الجوندارم إنزال كبير تحت إشراف القيادة العامة ديال الدرك الملكي فالرباط.
السرية ديال درك سطات مزال كتحقق فالموضوع وخدامة على ضوصي أفراد العصابة اللي هجمات على القهوة بالسيوفا وذلك بعدما حددات هوياتهم اللي باينة شادين فلوس باش يتعداو على الناس ونشروا الرعب والخوف في صفوف ساكنة البلدة الصغيرة ديال "ولاد سعيد".
مصدر "كَود" قال أن هذا الفيلم اللي واقع ف"ولاد سعيد" مزل كبار الأجهزة الأمنية فالرباط متبعين فيه كل كبيرة وصغيرة، وأضاف بللي يمكن تدخل الفرقة الوطنية على الخط باش تعتاقل أفراد العصابة لأنهم هم الحلقة المفقودة فهاد القضية و تبان للرأي العام ظروف وملابسات هذا لافير.