عجيب.. منتخب عموتة غيواجه قطر وغانا لي كيوجدو للمونديال ومنتخب خاليلوزيش غايب

غيشارك المغرب فدوري ودي ديال كرة القدم فالنمسا إبتداء من يوم 20 فشهر غشت، وغيكون فمنافسة مع مجموعة من المنتخبات لي مشاركة فكأس العالم فقطر فنونبر الجاي.
وكشفت مصادر مطلعة على أن المغرب غيكون مشارك فهاذ الدوري الودي غالنمسا، من خلال المنتخب الوطني المحلي لي فيه اللاعبين ديال البطولة الوطنية، ماشي المنتخب الأول لي فيه نجوم أوروبا والمحترفين فالخارج ولي تابعو كأس العالم لي بقات له أقل من 3 أشهر باش ينطلق.
والغريب فهاذشي أن المحليين لي كيدربهم الحسين عموتة ولي جامعهم دابا فمعسكر مغلق فمركز محمد السادس ديال كرة القدم فالمعمورة، غيواجهو المنتخب القطري الأول والمنتخب الأول ديال غانا، لي كيحضرو لكأس العالم من خلال هاذ الدوري الودي ديال النمسا لي غينطلق يوم 20 غشت وغيسالي يوم 26 من نفس الشهر.
هادشي كيطرح مجموعة من علامات الاستفهام على اختيار الجامعة الملكية المغربية لكرة القدم، خوض هاذ الدوري الودي ديال النمسا بالمنتخب المحلي، وعلاش ما تكونش المشاركة فيه بالمنتخب الأول باش يستعد مزيان للمونديال، وفحالة استعصت المشاركة ديال المحترفين خارج المغرب فهاذ الدوري الودي بحكم إلتزامهم مع الفرق ديالهم سواء فأوروبا أو الخليج، فعلاش تكون المشاركة بالمحليين لي بدورهم كان خاصهم يكونو دابا مع الفرق ديالهم باش بوحدو ريوسهم للموسم الجاي ولي غينطلق يوم 2 شتنبر، وهو لي غيخلي مرة أخرى الجماهير ديال فرق البطولة تعبر على الغضب ديالها اتجاه المسؤولين ديال الجامعة ويتساؤلو مرة أخرى من الفائدة ديال المنتخب المحلي، ولي سبق ليه فأكثر من مناسبة خلق الجدل بسبب استدعاء لاعبين مهمين بالنسبة للفرق ديالهم والمدربين فالبطولة الوطنية.