حرب بودريقة والبداروي وظفات محمد السادس. واش رئيس الخضرا الجديد بصاح حيد صورة الفينال مع بايرن اللي فيها الملك وولي العهد حقاش فيها بورديقة؟ صور

الحرب بين بوريقة محمد الرئيس الاسبق للرجاء البيضاوي ومحمد بدراوي الرئيس الحالي شعلات. بدات بلعاب وجدة. بودريقة قال باللي هاد اللعاب كان غادي يوقع للراجا وباللي الرئاسة الحالية ما بغاتش. رد الرئيس الحالي كان قوي: انا الرئيس ماشي انت.
اليوم وصلات الحرب لصورة الملك. صحاب بودريقة كيقولو باللي البدراوي حيد صورة نادي الرجاء البيضاوي اللي فيها الملك محمد السادس والامير ولي العهد والامير مولاي رشيد. صورة كتعود لنهائي كأس العالم للاندية اللي لعباتها الرجا ضد بايرن ميونيخ وربحوها لالمان اللي كان كيدربهم گوارديولا.
وفق نفس المصادر ل"كود" "التصويرة تحيدات من باب مقر النادي البارح فالليل". مصادر من نادي الرجاء نفات هاد الشي وقالت باللي هاد الشي ما عندو علاقة بشي صراع وباللي كيوجدو النادي وكيصبغو كلشي وغاديين يرجعو كلشي كيف كان.
المصدر قال ل"كود" باللي هاداك تاريخ النادي ماشي تاريخ لشي شخص