إسم جديد مرشح باش يكون فالمنتخب

صبح لاعب دولي سابق مرشح باش يكون مدرب مساعد فالطاقم التقني ديال المنتخب الوطني المغربي، اللي غايقودو وليد الركراكي فالمرحلة المقبلة.
والأمر كيتعلق حسب مصادر مطلعة بالدولي المغربي السابق غريب أمزين، بحيث تم وضع الاسم ديالو كبديل مطروح فحالة عدم التوصل لاتفاق مع عادل رمزي، اللي كيشترط يكون مدرب مساعد فالطاقم التقني ديال ليكيب ناسيونال وفنفس الوقت يبقى كمدرب ديال ليسبوار فإيندهوفن الهولندي.
وفنفس السياق، فكان صرح الدولي المغربي السابق عادل رمزي أنه عندو رغبة من أجل الاشتغال رفقة الطاقم التقني ديال المنتخب المغربي، ولكن فنفس الوقت يحتفظ بالعمل ديالو كمدرب ديال فريق أمل إيندهوفن، وأكد أن الفريق الهولندي عطاه الموافقة وكينتظر الرد ديال الجامعة واش غاتوافق أو لا.
للإشارة فالجامعة الملكية المغربية لكرة القدم من المنتظر باش تعلن فالأيام القليلة المقبلة على تعيين الطاقم الجديد ديال المنتخب الوطني المغربي، واللي غيقود وليد الركراكي المدرب السابق ديال الوداد الرياضي.