البدراوي حرج بودريقة ودار تصويرة الملك محمد السادس بوحدو مع اللوگو ديال الرجاء

وضع عزيز البدراوي الرئيس ديال الرجاء الرياضي صورة الملك محمد السادس مع شعار الرجاء الرياضي بمقر النادي، مكان الصورة السابقة اللي كايظهر فيها الملك مع المكونات ديال الرجاء فنهائي كأس العالم للأندية 2013.
الصورة السابقة ديال الملك محمد السادس مع اللاعبين ديال الرجاء ومحمد بودريقة خلقت "البوز" من بعدما حيدها عزيز البدراوي والكثير من المتتبعين للرجاء كايشوفو على أن المستهدف بهاذ الفعل هو بودريقة، بحكم الحرب الباردة ما بينو وبين البدراوي واللي كاتبان الملامح ديالو ساعة ساعة فالدقان على بعضيتهم فمواقع التواصل الاجتماعي.
عزيز البدراوي اليوم قام بوضع صورة ديال الملك محمد السادس بوحدو فالمكان ديال الصورة السابقة، ووضع معها شعار نادي الرجاء الرياضي ولقب كأس محمد السادس للأندية الابطال واللي الفريق الأخضر هو النادي المغربي الوحيد المتوج به ورفق الصورة بالعبارة المقتبسة من الرسالة الملكية اللي استقبلها الرجاء من الملك محمد السادس واللي قال فيها: "وليظل الرجاء مثالا جديرا بالاقتداء من لدن مختلف الأندية الرياضية الوطنية"
المتتبعين للحرب الباردة ما بين محمد بودريقة وعزيز البدراوي، كيشوفو أن الأخير لعب كبير وقدر أنه يحافض على الصورة ديال الرجاء كبيرة ووضع الصورة ديال ملك البلد مع شعار الفريق وهذا ارث ديال النادي وتاريخو ما شي ديال شخص أو أشخاص شاركو فنجاح فترة معينة من هذا التاريخ الكبير للرجاء.