واخا ربح قضيتو ضد النصر السعودي.. حمد الله ماغاديش مع المنتخب المغربي لكأس العالم

خرج الدولي المغربي عبد الرزاق حمد الله رابح فالقضية ديالو ضد فريقو السابق النصر السعودي، من بعدما حكم الاتحاد الدولي "الفيفا" لمصلحتو، ولكن الفرص ديالو فالمشاركة مع المنتخب الوطني المغربي فالمونديال كتبقى ضعيفة بزاف حيث الناخب الوطني وليد الركراكي ما مقتانعش به.
عبد الرزاق حمد علن على مواقع التواصل الإجتماعي، أنه ربح القضية ضد النصر السعودي، قال فيها: "كنحمد الله على قرار الفيفا اللي برأتني من إدعاءات باطلة وكنشكر إدارة نادي إتحاد جدة السعودي، على تفهمهم ودعمهم ليا فالفترة وكنشرك المحامين ديالي وجمهور الإتحاد".
وكيجي هاذ المستجد بالنسبة لعبد الرزاق حمد الله من بعد أيام قليلة فقط، على تصريح الناخب الوطني وليد الركراكي، اللي لمح على أنه من المستبعد يشارك حمد الله مع المنتخب الوطني المغربي فكأس العالم المقبلة فقطر، حيث قال أنه غادي يعتمد على 3 المهاجمين فقط وأنه باغي ليكيب ناسيونال تلعب بشكل جماعي ماشي تعتمد على لعاب واحد، حيث اللعاب الواحد ما كيربحش، وأكد بلي تفرج فواحد الماتش ديال حمد الله وما قنعوش.