لعاب الراجا السابق: المعيشة غلات يا سيدنا وخاصك تدخل

وجه الدولي المغربي السابق ياسين الصالحي النجم السابق للرجاء الرياضي نداء للملك محمد السادس، باش يتدخل بخصوص غلاء المعيشة اللي كيعرفو المغرب وكيعانيو منو بزاف ديال المغاربة منذ أشهر.
ياسين الصالحي اللي خلاتو كرة القدم يضمن العيش الكريم ويصوفي راسو، حتى هو وصلو الصهد ديال غلاء الأسعار اللي مدة هاذي والمغاربة كيعيشو فيه، وخرج فأنستغرام باش يوجه نداء للملك محمد السادس باش يتدخل.
وقال ياسين الصالحي: "ضروري من إيجاد حل لارتفاع الأسعار المخيف فالبلاد، المواد الغذائية الأساسية عرفت ارتفاع مهول فاثمناها حيث أغلبية المواطنين متضررين من ارتفاع الأسعار فما بالك بباقي الأسر الهشة صاحبة الدخل المحدود بالإضافة إلى المحروقات اللي كتنقص ربعة ديال بعد يومين كيزيدو درهم".
الصالحي اللي لعب فالرجاء وفالخليج فالسنوات الماضية وجه النداء ديالو مباشرة للملك وقال: "مغاربة كنموتو على بلادنا والملك ديالنا، كنتمنى من الملك ديالنا العزيز الله يعطيه الصحة والعافية، أن يتدخل لمعالجة هذا الخلل والمشكل لإعادة الأمور المعيشية إلى نصابها.