البدراوي لجأ للجمهور مرة أخرى باش يجيب لفلوس للرجاء

كيزيد يتأكد أن فلوس عزيز البدراوي رئيس الرجاء الرياضي بوحدها ما كفاياش باش تغطي مصاريف الفرقة، سواء لحل مشاكل النزاعات مع عدد من اللعابا السابقين أو باش توقع مع لعابا جداد فالميركاتو اللي جاي.
المكتب المديري ديال الرجاء ومن بعدما دار بطائق الاشتراك وكان عليهم طلب كبير من جمهور الفرقة ودار لاكارت ديال الأداء باش الرجاويين يخلصو منها احتياجاتهم اليومية ويستفد النادي من هاذ العملية، قرر برئاسة البدراوي يديرو التأمين فالنادي.
البدراوي بدا كيقلب على موارد مالية جديدة ورجع عند جمهور الرجاء مرة اخرى، وهاذ المرة خلق خدمة جديد ديال التأمين وسماه "رجا أسيرونس" اللي كتوفر التأمين على الطونوبيلات والشركات والديور وغيرها.
وكيبحث رئيس الرجاء عزيز البدراوي اللي قال فأخر تصريح له أن المديونية اللي على النادي واصلة لمبلغ 10 المليار، (كيبحث) مرة أخرى على مدخول جديد وكيشوف فالجمهور هو الحل لتوفير سيولة مالية جديد من خلال هاذ الخدمة الجديدة ديال لاسيرونس اللي طلق له باش ينخرط فيها.