بلجيكا خصم المغرب فكأس العالم خسرات ضد مصر

خسر المنتخب البلجيكي الخصم ديال المغرب فكأس العالم 2022، الماتش أميكال ديالو ضد مصر اليوم الجمعة فالكويت، وهو الماتش اللي شاركو فيه اللعابا البلحكيين كاملين باستثناء لوكاكو اللي مازال كيوجدو فيه حيث كان موعت.
بلجيكا خسرت بنتيجة 2 بيوتا لواحد مع المنتخب المصر، وخا البلجكيين سيطرو على الماتش وكانوا هما اللي شادين الكرة ولكن المصريين عرفوا يماركيو من المحاولات لقلال اللي جاتهم.
ونجح المنتخب المصري فتسجيل الهدف الأول فالدقيقة 34 واللي ماركاه هو مصطفى محمد من بعدما استغل خطأ ديال كيفن دي بروين وضرب الكرة نيشان للشبكة، والبيت الثاني ماركاه محمود تريزيكي فالدقية 46 اللي استغل أسيست ديال محمد صلاح ضرب الكرة فشبكة بلجيكا، قبل ما يماركيو البلجيكيين البيت ديالهم لويس اوبيندا فالدقيقة 76 واللي استغل لحظة كانوا فيها المدافعين المصريين ساهيين.
للإشارة فمنتخب بلجيكا هو الخصم الثاني ديال المنتخب الوطني المغربي فكأس العالم قطر 2022، وغادي يلعب معاه نهار الأحد 27 من هاد الشهر.