الوقت الأصلي بين المغرب وإسبانيا سالا تعادل ومشاو للأشواط الإضافية

سالا الوقت الأصلي من ماتش المنتخب الوطني المغربي ومنتخب إسبانيا اليوم الثلاثاء فتيران المدينة التعليمية ضمن ثمن نهائي كأس العالم قطر 2022، بالتعادل السلبي.
الشوط الأول والثاني من الماتش ما بين المغرب وإسبانيا ما عرفش تسجيل أهداف وحتى فرص التسجيل كانت قليلة، واخا كان المنتخب الإسباني الأكثر سيطرة واستحواذ على الكرة ولكن دون نتيجة، بالمقابل كان المنتخب المغربي راجع للخلف وداير بلوك وساد المساحات، مع العلم أن الدقائق الأخيرة من الماتش تحركو فيها اللعابا وكان كل المنتخب يقدر يخطف بيت .
الشوط الثاني من الماتش غير فيه الناخب الوطني وليد الركراكي ودخل عبد الصمد الزلزولي بلاصة سفيان بوفال، ووليد شديرة بلاصة يوسف النصيري، ونصير مزراوي خدا بلاصتو يحيى عطية الله، دخل عبد الحميد الصبيري مكان سليم أملاح، ونايف أكرد توعت ودخل بلاصتو جواد ياميق.
أما المدرب الإسباني لويس إنريكي فخرج بابلو مارتين باييز، وفيران توريس، وماركو أسينسبو، ودخل بلاصتهم كل من كارلوس سولر وألفارو موراتا ونيكو ويليامس.
ودابا من بعدما سالا الوقت الأصل من الماتش بالتعادل السلبي زيرو لزيرو، غادي يلعبو المنتخبين المغربي والإسباني 2 أشواط إضافية كل شوط فيه 15 دقيقة، وإلى سالاو تعادل غادي يمشيور لضربات الترجيح باش يتأهل منتخب واحد منهم لربع نهائي كأس العالم.