المغرب تعادل مع كرواتيا فماتش كان صعيب على الركراكي وولادو

تعادل المنتخب الوطني المغربي مع منتخب كرواتيا بنتيجة زيرو لزيرو اليوم الأربعاء فتيران "البيت" فالعاصمة القطرية الدوحة، ضمن أول جولة من كأس العالم قطر 2022.
وعرف الشوط الأول توازن من ناحية خلق الفرص اللي ماكانش كثيرة ما بين المنتخبين، مع استحواذ كثر من الكرواتيين على الكرة واللي كانوا قراب يماركيو ولكن تدخل ياسين بونو 2 مرات وعتق المرمى المغربية، عكس المغاربة اللي كانوا متحفظين شويا من الناحية الهجومية.
ومع البدية ديال الشوط الثاني توعت نصير المزراوي فجنبو ليسري وما قدرش يكمل الماتش وخرج، ودخل فبلاصتو يحيى عطية الله، واستمر الريتم ديال الماتش كيفما هو من الأول، وبقاو الكرواتيين شادين الكرة والمغاربة متحفظين بزاف وبان بلي كاين مشكل فالتحول من الدفاع للهجوم عند المنتخب المغربي، داكشي علاش بدل الركراكي ودخل عبد الصمد الزلزولي اللي كان كيخسر الكواري بكثرة المراوغات، وعبد الحميد الصابيري، وخرج يوسف النصيري ودخل عبد الرزاق حمد الله، ولكن ظلت الأمور كيفما هي حيث كرواتيا كانت مزيانة فاسترجاع الكرات والمغاربة كانت كتضيع الكرة بسرعة وحتى حاجة ما تبدلت حتى سالا الماتش بالتعادل زيرو لزيرو.