بوفال: ما باغيش نفيق من الحلم وماغاديش نحبسو فنصف النهائي

عبر سفيان بوفال نجم المنتخب الوطني المغربي على الفرحة ديالو بتأهل ليكيب ناسيونال لأول مرة فتاريخ كرة القدم المغربية إلى نصف نهائي كأس العالم ، وأكد بلي كيفكرو فالماتش الجاي.
وقال سفيان بوفال من بعدما ربح المغرب البرتغال بنتيجة واحد لزيرو فربع نهائي كأس العالم قطر 2022، وتأهل لنصف النهائي: "باقي كنحلم وما باغينش نفيق من النعاس، وكنشكر الجمهور المغربي وتأهلنا دابا لنصف النهائي وباقي غادي نزيدو القدام".
وزاد بوفال وقال: "ملي كتكون فالتيران ما كتفكرش فالضغط وكدير خدمتك، والمهم فرحنا جميع المغاربة وماغاديش نحبسو فنصف النهائي".