حمد الله: إلى عطاوني الفرصة ديالي كاملة فالمنتخب غادي نقدم أحسن ما عندي وأكثر.. واش منيتو؟

مازال طامع المهاجم المغربي عبد الرزاق حمد الله فحمل التوني المغربي، فتشكيلة المنتخب الوطني المغربي فالمستقبل، وهادشي بالرغم من المستوى ديالو اللي ما كانش مقنع خلال كأس العالم قطر 2022.
عبد الرزاق حمد الله مازال متفائل عندو الثقة فراسو وكيطالب بفرصة أكبر من الفرصة التاريخية اللي عطاه وليد الركراكي فكأس العالم قطر 2022، من بعدما دار خاطر الجمهور المغربي وعيط لمهاجم اتحاد جدة باش يشارك فالمونديال ومن بعد منها هادوك المغاربة اللي كانوا كيضغطو على الركراكي يعيط له هم نفسهم اللي دارو فيه بسبابو وهاجمهوه، حيث عطاه الفرصة يلعب من بعدما بين مستوى أقل بزاف من داكشي اللي كانوا كيتسناو منو.
عبد الرزاق حمد الله وجه رسالة للمغاربة على مواقع التواصل الاجتماعي وقال فيها: "سالا كأس العالم وراني فرحان بزاف حيث صنعنا التاريخ ووصلنا لدومي فينال المونديال، وإذا تعطاتني الفرصة كاملة فالمستقبل غادي نعطي أحسن ما عندي وأكثر".
وكان الناخب الوطني باغي يعتمد على عبد الرزاق حمد الله باش يكون أحسن بديل ليوسف النصيري ومنافس له فمركز رأس الحربة، ولكن لا عبد الرزاق حمد الله ولا البديل الآخر وليد شديرة قدمو الأداء اللي كان منتظر منهم الشي اللي غادي يجعل الركراكي مطالب بالبحث عن مهاجم قناص باش يدعم به هجوم المنتخب المغربي فالمستقبل.