شوهة الرياضية فاستقبال المنتخب.. المغاربة غاضبين من القناة بسبب الاستوديو الناشف والتصوير الهاوي فحدث مغربي عظيم

ما لقاش تعامل قناة الرياضية مع استقبال المنتخب الوطني المغربي من طرف الجماهير المغربية، اليوم بالرباط، من بعد المشاركة ديالو فكاس العالم قطر 2022، استحسان المتتبعين.
عبر الكثير من المغاربة اللي تابعو وصول المنتخب الوطني المغربي إلى المغرب والتوجه ديالو عبر شوارع سلا والرباط إلى القصر الملكي، على عدم الرضا طريقة التغطية اللي قامت بها قناة الرياضية لهاد الحدث التاريخي سوا بالاستوديو التحليلي أو لطريقة التصوير.
مواقع التواصل الاجتماعي فاضت بغضب المغاربة على قناة الرياضية اللي وجدت استوديو تحليلي ناشف، وجايبين فيه واحد 2 محليلين من جيل قديم عاطينها للشفاوي بلا ما تكون أرقام وإحصائيات على تاريخ كرة القدم المغربية أو الرياضة المغربية، وأيضا إحصائيات المنتخب الوطني فكأس العالم قطر 2022، واللي خصصت لها قنوات أجنبية كبيرة مجال للحديث عليها فالوقت اللي القناة الرياضية المغربية بقات عاطياها للهضرة وتقرقيب الناب ما بين المقدم ودوك 2 اللي معاه فالبلاطو واللي بداو كيمدحو ويطبلو لإدارة القناة وتغطيتها الفاشلة.
حاجة اخرى، قلقات المغاربة وهي طريقة تصوير الاستقبال، واللي ما رقاتش لمستوى التطلاعات سواء من ناحية جودة الصورة أو من ناحية زوايا التصوير خصوصا وأن بروتوكول استقبال المنتخب الوطني المغربي حيث موكب ليكيب ناسيونال مر من وسط أمواج بشرية كبيرة ديال الشعب المغربي اللي خرج يشكر ولادو الاسود على الفرحة اللي رسم على الوحوه ديالو لمدة شهر بالإفراح فكاس العالم، بالإضافة إلى أن حافلة المنتخب دازت من أمام معالم تاريخية كبيرة وهي فطريقها من مطار الرباط سلا إلى القصر الملكي فعاصمة المملكة، وهادشي ما تمش التركيز عليه مع الأسف الشي اللي كيطرح علامات استفهام كبيرة على الطريقة اللي كيتم بها التعامل مع هاد الاحداث الرياضية من طرف القناة.