اش هاد التخربيق دايراه جامعة الكورة واش باغية ترجع القدسية للعابة حيدها الدستور حتى على رئيس الدولة؟. ابو خلال يكتب عليه جورنال سلفي وفين المشكل. من حقها تتساءل وماشي من حق الجامعة تهدد. خاصها ترد على فضيحة التذاكر بعدا

الجامعة الملكية لكرة القدم دخلات فامور ماشي سوقها. كتدخل فمجال العقيدة كاع. جورنال "اش كاين" دار خبار فيه ان لعاب الاسود زكريا ابو خلال "سلفي يلتحق بالاسود". وهدرو علي "تلك المُمارسات التي صدرت عن اللاعب زكرياء أبو خلال، من تصرفات وإيحاءات ذات مرجعية دينية سلفية" وهدرو على العلم اللي هزو ودار بحال اللي كيديرو المتطرفين. طبعا كانت صحف اجنبية هدرات على هاد السلوك. واش ابو خلال كيقصد "نامبر وان" بالنسبة للاسود او كيحيل على قضية التطرف؟ ما نقدروش ندخلو فعقيدتو باش نعرفو.
لكن من حق الجورنال يسول. من حقو يتساءل على تصرفات تقدر تأثر على المنتخب كولو. صاحبنا مع لعاب اخر هو جواد ياميق تصورو مع الداعية النصاب نازير نايك. كيفاش وصل ليهم واش قربو منهم وشكون عرض عليه.
من حق الجورنال يتساءل لكن اللي غريب هو بيان الجامعة الملكية لكرة القدم اللي صدر اليوم. اييه اليوم الاحد. فيه ان المقال "يمس شخص وسلوك اللاعب الدولي المغربي زكرياء ابوخلال اثناء مشاركته صحبة النخبة الوطنية في نهائيات كاس العالم قطر 2022". اش من مس هادا. واش ايلى قال عليه سلفي راه مس. راه من حقو يكون اللي بغى ومن حق الجورنال يتساءل ويخاف على بلادو. شفنا كلشي باغي يآبروبريي الرباح ديال الاسود ليه. فين المشكلة
الجامعة قالت فبيانها الغريب "تنفي الجامعة الملكية المغربية لكرة القدم نفيا قاطعا الاتهامات الباطلة التي طالته في هذا المقال حيث ابان اللاعب عن سلوك مثالي الى جانب زملائه من اجل تحقيق نتائج مشرفة للنخبة الوطنية في هذا المحفل العالمي". دابا الجامعة ولات كتدخل لعقيدة حتى اللعابة. تنفي على هادا انو سلفي والاخر علماني والثالث من الاخوان والرابع ما من حتى شي جماعة. هاد الشي راه "شأن خاص". بيان الجامعة اورجو وصافي.
الاخطر فالبيان انو بعد "ادانتها الشديدة في تعاطي هذا الموقع الإلكتروني مع شخص وسلوك اللاعب زكرياء ابو خلال ومن خلاله لصورة المنتخب الوطني بكل فعالياته" هددات انها "ستلجا الى المساطر القانونية لحماية اعضاء المنتخب الوطني لكرة القدم ودحض كل ادعاءات باطلة تمس سلوكهم او حياتهم الشخصية اثناء ممارسة مهامهم الوطنية". اش هاد التخربيق. سيرو دعيو. قولو للقاضي راه قال على بوخلال سلفي. واش بعقلكم.
الجامعة كان يتسنى منها لمغاربة بيان على التذاكر وما اثارته من نقاش. على اللي دخلو للتيران وماشي اعضاء فالوفد الرسمي.
ابو خلال يقدر يكون سلفي. من حقو. لكن عقيدتو خاصها تبقى شخصية وما يفرضها على حد. من حقو يكون مآمن باللي بغى طالما ما اثرش على المنتخب. الصحافة من حقها تكشف على هاد الشي. تهدر عليه. تجبدو. ما ترجعوناش لسنوات الرصاص باسم عدم المساس بالمنتخب. راه الدستور الجديد حيد القدسية على رئيس الدولة وما ترجعوهاش للعابة.