مشاكل تونيات الرجاء مازال ما تحلت

كيواجه الرجاء الرياضي مشاكل كبيرة بخصوص تونيات الفريق فهاد الموسم، بالرغم من أن النادي تعاقد مع شركة عندها اسمها فالساحة العالمية ديال التجهيزات والألبسة الرياضية.
إدارة الرجاء الرياضي برئاسة عزيز البدراوي مازال كتقلب على حل لمشكلة التونيات، اللي كان خاصها تكون تحلات منذ وقت طويل سواء بالنسبة الأقمصة اللي كيلعبو بها اللعابا ديال الفريق أو بالنسبة الأقمصة المخصصة للبيع للجمهور، واللي كان من المنتظر تشكل واحد الدخل مالي مهم ولكن مازال ما قدر النادي يستفد حتى بدرهم من هذا الجانب.
وفالماتشات الماضية ديال الرجاء تبين أن الكميات ديال التونيات اللي توصل بها الفريق منذ بداية الموسم الحالي محدودة بزاف، وهادشي تأكد من حالة الأقمصة اللي ظهر بها الفريق فالمباريات اللي كايبانو فحال إلى مصبنين أي أنهم تلبسو وتعادو تلبسو، وهادشي من غير السوكتش اللي توضعت أكثر من مرة باش تغطي الاسم أو الشعار ديال شي مستشهر ما بقاش عندو التزام مع النادي.
جماهير الرجاء الرياضي حتى هي تشكات لمكتب المديري للنادي برئاسة عزيز البدراوي فأكثر من مرة بسبب التونيات حيث دخلت تشريهم من الموقع الإلكتروني ديال الشركة المذكورة ولكن، كاين فالمشجعين اللي مازال ما توصل بالتوني ديالو اللي وكاين اللي تصدم من الثمن المرتفع بسبب الديوانة، وكاين اللي ما جاش التوني قدو، والنادي رسل ريكلاماسيون للشركة أكثر من مرة ولكن بدون تجاوب ملموس.