لاعب مهم رجع الوداد قبل ماتش تطوان وصامبو مرشح للغياب مدة طويلة على الحمرا

غيسترج الوداد الرياضي اللاعب ديالو يحيى جبران فالماتش ديال غدا الأحد، أمام المغرب التطواني ضمن الجولة 11 من منافسات البطولة الاحترافية لكرة القدم فالوقت اللي غيتحرم من خدمات السنغالي صامبو جونيو ولكول رضا التكناوتي وجلال الداودي.
الوداد الرياضي فماتش المغرب التطواني غيكون معه يحيى جبران اللي هو لاعب مؤثر فصفوف الفريق والغياب ديالو كيبان، وهادشي اللي وقع ضد شباب المحمدية فآخر ماتش الحمرا حيث كان موقف بسبب 4 الإنذارات اللي كانوا عندو، ومن المنتظر تعطي العودة ديال جبران حيوية ونشاط لوسط تيران الوداد وأيضا ترفع من المعنويات ديال اللاعبين حيث هو الكابيتان ديال الفريق وعندو دور مهم سواء من الجانب التقني والتكتيكي أو حتى بالنسبة للمورال ديال صحابو فالفرقة.
أما غيابات الوداد الرياضي فتبين أن الإصابة ديال المهاجم السنغالي صامبو جونيو فالماتش الماضي ماشي خفيفة، واللاعب غيكون مضطر يتغيب فالمرحلة المقبلة على الفريق ويقدر يوصل الغياب ديالو لمدة شهرين أي أن المشاركة مع الحمرا فكأس العالم للأندية صعيبة بزاف، فانتظار نتائج العمل اللي غيدير معه الطاقم الطبي للوداد، وبالإضافة لغياب صامبو على ماتش تطوان فحتى جلال الداودي ورضا التكناوتي ما غاديش يكونو حاضرين بسبب الإيقاف ديالهم من بعد الطرد اللي تحصل عليه الأول فأخر ماتش ضد المحمدية، والثاني فالماتش قبل الأخير ضد الجيش الملكي.