الكورفاسود بدات كتحرك لإنقاذ الرجاء بعد عجز البدراوي وعطاتو آخر فرصة

تبرع مجموعة "الكورفا سود" المساندة لنادي الرجاء الرياضي بأكبر حصة لحدود الأن، من التبرعات فالصينية اللي خرج عزيز البدراوي رئيس النادي يطلب بها باش يجمع فلوس يفك بهم المشاكل المالية ديال الخضرا، من بعدما عجز هو على ذلك.
وكوتيزات "الكوفا سود" مبلغ 20 مليون سنتيم فمبادرة "الرجاء معانا وحنا معاها" وهو الاسم اللي طلق عزيز البدراوي على الصينية اللي دار باش يلعب على عواطف البيبليك الرجاوي، واللي بدا صبرو كيسالي بسبب ارتجالية الرئيس الحالي للنادي وحتى ثقة الرجاويين فيه بدات كتهرس حيث فالأول قدم نفسو بأنه منقذ الرجاء والميلياردير مول الشكارة اللي غيشري كبار يربح بهم الفريق الألقاب ويدير ميسة ولكن قلبها صينية من بعد تقريبا 6 أشهر على الصعود ديالو كرئيس.
وكتجي المساندة المالية ديال جمهور الرجاء الرياضي والمساهمة فجمع لفلوس حسب عشاق الخضرا، ماشي على قبل عزيز البدراوي وإنما على فريقهم اللي كيشوفوه مهدد بالحرمان من الانتدابات فهذا الميركاتو حيث الرئيس الحالي عجز يخلص 580 مليون مليون.
بزاف من جمهور الرجاء الرياضي فقد الثقة فعزيز البدراوي ومنحوه الميركاتو الحالي كأخر فرصة باش يبين النوايا ديالو فحل مشاكل الخضرا، حيث وإلى حدود الآن كيشوفو أن الوعود اللي عطاهم قبل ما يشد الفريق وخلال الايام الاولى من رئاستو باقي ما حقق منها والو، والرجاء فالمرحلة ديالو غير كتزيد تغرق فالأزمة المالية والمردود التقني المتواضع إضافة إلى النتائج المتذبذبة.