السوالم فرضو التعادل على الحسنية ورجعو بنقطة من أكادير

فرض فريق شباب السوالم التعادل على حسنية اكادير اليوم الأربعاء فتيران أدرار بمدينة أكادير، ضمن الجولة 13 من منافسات البطولة الإحترافية لكرة القدم.
وسالا الماتش ما بين حسنة أكادير وضيفو شباب السوالم بنتيجة واحد لواحد، وكان الفريق السوسي هو السباق للتسجيل بهدف أول ماركاه المهاجم يوسف ميهري فالدقيقة 23، وكانت عندو فرصة باش يعزز الحصة للحسنية مباشرة من بعد ذلك بدقيقة من ضربة جزاء ولكن ضيعها.
وفالشوط الثاني قدرو السوالم يرجعو فالماتش وضربو التعادل فالدقيقة 62 عن طريق جبريلا سيلا المعار للفريق من الرجاء الرياضي من بعدما كان رسلو المدرب السابق الخضرا فوزي البنزرتي حيث ما مقتانعش به، ولكن ملي بدا مع السوالم وهو بمحيح، وظلت النتجية ما بين الحسنية والسوالم واحد لواحد حتى سالا الماتش.
نتجية التعادل خلات الفريقين يتقاسمو نقاط المواجهة بنقطة لكل واحد فيهم، وظل فريق حسنية اكادير فالمركز 12 وعندو 13 نقطة، أما شباب السوالم كيحتل المركز الخامس برصيد 20 نقطة.