واش هادشي فخبار الكاف؟ مسؤول بسيمبا التنزاني هاز بوق وكيحرض فالشارع على الرجاء وكيهدد بذبح الفريق الأخضر

كلما قرب الماتش ما بين الرجاء الرياضي والمضيف ديالو سيمبا التنزاني فالجولة 2 من عصبة أبطال إفريقيا لكرة القدم، كيزيد يتأكد أن الفريق التنزاني غيلعب ماتش ديال العمر ضد النسور وغيستعمل الوسائل المشروعة وغير المشروعة.
هاد العشية خرج مرة أخرى أحمد علي الناطق الرسمي ديال سيمبا التنزاني للشارع عند الجمهور وبدا كيكلم بواحد الطريقة فيها تعصب كبير، لدرجة أنه بدا كيتحلف بطريقة كلامو على الرجاء وأن سيمبا غيديرو أي طريقة باش يربحو 3 بوان.
هاد الكلام ديال المسؤول الإعلامي فسيمبا، واخا يكون فإطار الضغط على الخصم ما خاصوش يخرج من فم واحد مسؤول بفريق كيلعب مسابقة إفريقيا وهادشي كيخلي المتتبعين ديال الكرة الإفريقية يتساءلون عن موقف الكاف من هذا التطرف الكروي اللي يقدر يهدد سلامة بعثة ممثل كرة القدم المغربية خصوصا وان بزاف ديال محتمعات إفريقيا جنوب الصحراء عندهم عقلية مبنية على القبلية.
أحمد علي شد بوق وكيدور فالشارع والسواق بدار السلام فتنزانيا وجمع عليه عدد كبير من جماهير سيمبا وقال: "حنا ما غاديش نضحكو مع الرجاء وكنقولو لهم غادي تخليون 3 بوان هنا، وراه غذبحهم فالتيران ديالنا، كيفما ربحنا الأهلي المصري ونهضة بركان".