سيمبا التنزاني كيستغلو ماتش الرجاء باش يشاركو فسوبر ليك الإفريقي

كيتزامن وصول الرجاء الرياضي إلى تنزانيا باش يلعب مع سيمبا التنزاني فعصبة أبطال إفريقيا، مع حلول بعثة من الاتحاد الأفريقي لكرة القدم اللي باغيا تشوف جاهزية الفريق التنزاني للمشاركة فبطولة سبور ليك الإفريقي.
ووصل وفد من الاتحاد الإفريقي لكرة القدم هاد الصباح لدار السلام بتنزانيا، باش يشوف الإمكانيات ديال سيمبا التنزاني والمقدرة ديال هاد الفرقة للمشاركة فبطولة سوبر ليك، وهادشي بالتزامن مع وصول الرجاء اللي غيلعبو مع نفس الفريق فعصبة أبطال إفريقيا السبت الجاي.
ومن المنتظر يحضر الوفد ديال الكاف للماتش بين سيمبا و الرجاء الرياضي، ويشوف الأجواء قبل المباراة والتيران ديال الفريق التنزاني، باش يعطي الملاحظات ديالو ويرفعها للاتحاد الإفريقي والغريب فالأمر أنه كينين فوارق كبيرة ما بين سيمبا اللي مرشحها الكاف تشارك فالسوبر ليك والرجاء اللي مستبعدها وفوارق اللي كبيرة بزاف وفكلشي.
فريق سيمبا التنزاني عارف ميزان أن الماتش ضد الرجاء الرياضي ماشي ماتش ديال 3 بوان فعصبة الابطال فقط، ولكن عارف بلي هذه المواجهة هي مصيرية ومباراة العمر باش يكون حاضر ومشارك فأول نسخة من سوبر ليك، وعارف أن ملاحظات لجنة الكاف غتكون مهمة فهادش.
رئيسة تنزانيا خصصت مكافآت للفوز على الفريق الأخضر وسيمبا نزلو ثمن تذاكر الماتش ومعولين على حضور 60 الف متفرح فالتيران ضد الرجاء وسالاو ليتيكي، والشوارع ديال دار السلام كلها من البارح الأربعاء وهي كتكلم غير على الكرة والماتش مع الفريق المغربي، وهادشي باش يبينو على الشغف ديالهم بكرة القدم وأن سيمبا كيستحق يلعب سوبر ليك.
الفوارق الكبيرة ما بين الرجاء الرياضي وسيمبا التنزاني كتأكد أن ترشيح الكاف للفريق التنزاني واستبعادو للفريق المغربي إلى جانب فرق أخرى فحال الزمالك المصري ونجم الساحلي التونسي، ماشي منطقي وفيه إرضاء للخواطر داخل الإتحاد الإفريقي لكرة القدم ولكن المشكل كيشوفوه بزاف من جماهير الرجاء كيتجلى كذلك فضعف إدارة النادي والرئيس عزيز البدراوي اللي ما عرفش يدافع على الفريق.